Бернабеуде кім жаңа бапкер болады?

ФИФА агенті Хота Хорди  Реалдың бапкері жазғы маусымда ауысатынын айтты. Жаңа менеджер болып «Тоттенхэм» клубының бас бапкері Маурисио Поччетино тағайындалмақ. Осыған орай жаңа командаға ауысқысы келіп жүрген Марко Асенсио асығыстық танытпайын деп отыр. Себебі, жаңа маман Реалдың ойынын сол арқылы жасақтамақ екен. Ал Зиданды осы уақытқа дейін жинаған абыройы құтқармайтын сыңайлы.

@aibek_kossan

Мбаппенің мәселесі май шаммен қаралды

«ПСЖ»-ның шабуылшысы Килиан Мбаппе лига кубогының жартылай финалында алаңға шығып, «Ренн» клубының ойыншысы Исмаил Сарраға қарсы тәртіп бұзған болатын. Француз лигасының тәртіп комитеті бұл жайтты бейжай қалдырмады. Аталған істі толығымен зерттеген мамандар Килианға 2 ойынға қатысуға шектеу қойды. 19 жасар ойыншы өз кезегінде қателігін мойындаған. Енді ол 17 ақпан күні «Страсбурға» қарсы алаңға шықпайды.

@aibek_kossan

Коутиньоның дебюттық голы немесе «Барса» финалда

Картинки по запросу барселона валенсия

Кеше түнде «Местальеде» Испания кубогы додасындағы жартылай финалдың жауапты кездесуі өтті. Аталмыш стадионның қожайындары болып саналатын «Валенсия» каталондық «Барселонаға» 0:2 есебімен есе жіберіп, жарыс жолынан шығып қалды. Барселонада өткен алғашқы ойында 1:0 есебімен жеңіліс тапқан алаң иелеріне финалға жолдама алу үшін кем дегенде екі доп айырмасымен жеңу керек еді. Соны естерінен шығармай кездесу барысында шабуылға үңіліп кеткен «жарқанаттар» қорғанысты ұмытып кетті. Есесіне қателік кешірмейтін қонақтар осындай сәттерді тиімді пайдаланып керекті голдарын соғып, кездесудің тағдырын шешіп тастады. Кезінде «Ливерпульдің» сапында АПЛ-ды шулатқан Суарес пен Коутиньо дуэті сол бір кездерді еске алғандай болып «Барсаның» бірінші голын ұйымдастырды. Суарестің пасынан соң Коутиньо көп күттірмей өзінің дебюттық голын соқты. Артынша сол Суарес Ракитичтің гол соғуына жәрдемдесті. Хорваттың голы кездесудің нүктесін қойды. Осылайша Вальверде шәкірттері Кубоктық жарыстың ақтық мәресіне қатарынан 5-ші рет шығып отыр. Қазіргі ойындарымен ішкі чемпионатта қарсылас таппай қиналып жүрген каталондықтардың биылғы маусымда жүлдеден құр алақан қалмайтындарына көпшілік футбол сүйер қауым сенеді. Алайда доп домалақ екенін ұмытпаған абзал.

Руслан МЕРАЛИЕВ

70-тегі ақсақал: «Ескі құрам жаңа табыстарға жете алады!»

Қысқы трансферлік маусым Испания клубтары үшін де тартысты болды. Айналдырған бір айдың ішінде құны 315 миллион еуроға 57 келісім жасалыпты. Бұл өткен жылмен салыстырғанда 5 есе көп. Елдің бәрі алыс-беріс, барыс-келістің қамымен жүргенде Перес ақсақал жұмған ауызын ашпай, күңіреніп ұзақ отырды. Жастау кезінде клубқа ойыншы мен бапкер шақ келтірмеуші еді. Осы қыста ешкімді шақырмады, құрамдағы ойыншыларды да сатпаған жалғыз «қожайын». Бернабеу жақ тыныш жатқанымен, Камп Ноу қарап қалмады.  «Барселона» колумбиялық Ерри Мина мен бразилиялық сиқыршы Филиппе Коутиньоны қатарына қосты. Бұлардан басып озғандар да бар. Мысалы, «Леванте», «Малага», «Лас-Пальмас» сынды клубтар 7 бірдей трансфер жасаған.

@aibek_kossan

«Аяғы ұзын» төрешінің тәртібі қаралды

«Нант» — «ПСЖ» ойынында Диего Карлосты теуіп, артынан қызыл қағаз көрсеткен 45 жастағы төрешінің теріс әрекетіне байланысты 1 лиганың тәртіп комитеті шешім шығарды. «Sky Sports» телеарнасы таратқан ақпаратқа сүйенсек,  Тони Шапрон 3 айға қызметінен босатылды. Оған қоса тағы 3 ай шартты түрде бақылауда болады. Көпшілік назарын аударған оқиға тіркелмес бұрын «жүйкесі жұқарған» маман осы маусымды аяқтап зейнетке кететінін айтқан еді. Жалпы, Францияның бірінші лигасында ол 400 ойынға төрешілік еткен.

@aibek_kossan

Марездің жағдайы мәз емес

Қысқы трансфер жабылғанымен оның айналасындағы дау әлі де толастаған жоқ. «Лестер» клубының ойыншысы Рияд Марез «Манчестер ситиге» ауыса алмағаны үшін командада жаттығудан бас тартқан. «Ауысым науқаны аяқталған соң алжир футболшысының өкпесі қара қазандай» — деп жазады ағылшын басылымдары. Жартылай қорғаушының бұл қадамы клуб басшыларының ашуына тиіпті. Осыдан кейін Рияд 2 апталық айлығы көлемінде, яғни 228 мың еуро айыппұл төлейді.

@aibek_kossan

Өзіл «өзімшіл» жігіт емес екен

Арсен Венгердің арқасынан бір ауыр жүк түскендей. Арсеналдың жартылай қорғаушысы Месут Өзіл лондондық клубпен келісім шартын ұзартты. «Daily Mail» таратқан ақпаратқа сәйкес, неміс құрамасының  ойыншысы 2021 жылға дейін «Эмирейтсте» доп тебеді және аптасына 340 мың еуро (теңгеге шаққанда шамамен 136 миллион) ақша табады. Өзіл ұзақ уақыт құжатқа қол қоюдан бас тартқан болатын. Бірақ, қысқы трансфер уақытында команда сапына Мхитарян және Обамеянг сынды шебер футболшылардың келуі оның көзқарасын өзгерткен сыңайлы.

@aibek_kossan

Феллайни «Тоттенхэм» — «Манчестер Юнайтед» ойынына не үшін кіріп шықты?

Лондонда өткен «Тоттенхэм» мен «Манчестер Юнайтед» командаларының текетіресінде алаңға 2 таймның 63 минутында шыққан Маруан Феллайни небәрі 7 минуттан кейін өзін алмастыруды сұрады. Теледидар алдында отырған көрермендер, тіпті «Матч тв» арнасының комментаторлары Моуриньоның тактикасы күрт өзгерді ме деп топшылады. Бірақ, «Уэмблиде» 2:0 есебімен ұтылған манчестерлік клубтың бас бапкері ойыннан кейінгі баспасөз жиынында мәселенің мән жайын түсіндірді. «Маруан ойын өрнегін өзгертемін деп шықты. Дегенмен, тізесі қайта сыр берді» — деді Жозе. Жартылай қорғаушы 7 қазаннан бері осымен үшінші рет жарақат алды. «ESPN» мамандарының жазғанына қарағанда бельгиялық ойыншы 2 айға дейін ем-дом қабылдайды.

Еске салайық, Феллайнидің клубпен келісім шарты осы жылдың 30 маусымында аяқталады. Денсаулығы сыр беріп жүрген футболшының ойынға толыққанды дайын болуы сиреп барады. Сондықтан, жаңа келісім болар-болмасы белгісіз. Ал Юнайтед  болса осы жеңілістен кейін «Манчестер Ситиден» 15 ұпайға қалып келеді.

@aibek_kossan

Ресей-2018 жайлы

Ұлттық құрама қай күні ойнайтыны белгілі болды

Футболдан Қазақстан ұлттық құрамасы Ұлттар лигасы жарысын қыркүйектің 6-сы күні бастайды. Ай сайын 2 матчтан өткізеді. Егер өз тобында бірінші орын алса, «С» дивизионына көтеріледі, әрі Еуропа чемпионатына жолдама беретін плэй-офф матчтарына қатсады.

6 қыркүйек: Қазақстан — Грузия
10 қыркүйек: Андорра — Қазақстан
13 қазан: Латвия — Қазақстан
16 қазан: Қазақстан — Андорра
15 қараша: Қазақстан — Латвия
19 қараша: Грузия — Қазақстан

Программы для Windows, лучшие CMS, шаблоны Фотошоп.