Агент мәлімдеме жасады – “Шепши” капитаны Қазақстанға ауысуы мүмкін

Қазақстандық клубтардың бірі Румыниялық "Шепши” клубының тірегі — Роланд Никзулиді қатарға қосуға ниетті.

Агенттің құпиясы: "Бір ғана клубқа ұсындым"

Бұл ақпаратты футбол агенті Мариус Аврам растады. Оның айтуынша, 30 жастағы тәжірибелі голкипер үшін Қазақстаннан нақты қызығушылық бар.

"Біз Роланд Никзули бойынша келіссөздер жүргізіп жатырмыз, бірақ әзірге ресми ұсыныс түскен жоқ. Шынымды айтсам, мен оны Қазақстанда тек бір ғана клубқа ұсындым. Әзірге ол клубтың атын атай алмаймын.” — деді агент Legalbet.kz тілшісіне берген сұхбатында.

Никзули деген кім және ол несімен ерекше?

Роланд — Румыния чемпионатында өзін дәлелдеген, "Шепши” сапында бірнеше маусым бойы негізгі құрамда өнер көрсетіп келе жатқан мықты ойыншы.

Жасы отызда — қақпашы үшін нағыз кемеліне келген, тәжірибе мен физикалық бабының үйлескен шағы.

Тәжірибелі қақпашы 2016 жылдың жазында "Университати Клуж" клубынан “Шепшиге" ауысып, сол уақыттан бері осы команданың ойыншысы болып келеді. Алайда осы маусымда бірнеше жыл бойы команданың капитаны болған Роланд ресми матчтардың ешқайсысына қатысқан жоқ.

Мұның себебі — Румыния Суперлигасынан төменгі лигаға түсіп қалғаннан кейін “Шепшидің" бас бапкері Ласло Дьошеги мен Никзули арасында жанжал туындаған. БАҚ деректеріне сүйенсек, қақпашы клубтан кету үшін 200 мың еуро өтемақы талап етіп отыр, алайда “Шепши" бұл талаппен келіспейді. Клуб басшылығы ойыншы өзіне жаңа команда тауып, ешқандай өтемақысыз кетеді деп күтуде.

Роланд Никзули бір кездері Румынияның жастар құрамасына шақырылған. Ал Transfermarkt порталы қазіргі таңда бұл футболшының нарықтық құнын 225 мың еуро деп бағалап отыр.