Александр Заруцкий “Қайраттан” неге кетті? – Рафаэль Уразбахтин трансфердің мән-жайын ашты
Алматылық “Қайраттың” бас бапкері Рафаэль Уразбахтин өткен маусымның басты қаһармандарының бірі, қақпашы Александр Заруцкийдің командадан кетуіне қатысты пікір білдірді, деп хабарлайды Aladop.kz.
Маманның айтуынша, ол тәжірибелі голкиперді құрамда алып қалуды қалаған, бірақ қаржылық мәселелер кедергі болған.
Басшылық пен бапкер арасындағы таңдау
Рафаэль Уразбахтин клуб басшылығынан Заруцкиймен келісімшартты ұзартуды жеке өзі сұрағанын жасырмады. Алайда клуб қожайыны Қайрат Боранбаев “Қайраттың” қақпашы сұраған жалақыны төлеуге дайын емес екенін нақты кесіп айтқан. Осылайша, тараптар ортақ мәмілеге келе алмай, Александр еркін агент ретінде басқа ұжымға ауысуға мәжбүр болған екен.
Бүгінде Александр Заруцкий — “Ақтөбе” клубының ойыншысы. Ол “Қызыл-Ақтармен” 2027 жылдың соңына дейін жарамды келісімшартқа отырған.
Александр Заруцкий 2025 жылғы маусымда Алматылықтардың Қазақстан чемпионы атануына және өз тарихында тұңғыш рет Чемпиондар лигасының негізгі кезеңіне жолдама алуына зор үлес қосты.
Қақпашы Қарағандылық “Шахтердің” тәрбиеленушісі. Бұған дейін “Астана”, “Қайсар”, “Ертіс”, “Атырау” және “Қызылжар” секілді ұжымдардың намысын қорғаған.
Қазақстан құрамасы сапындағы дебютін 2024 жылдың жазында Әзірбайжанға қарсы ойында өткізген болатын.
Біздің серіктес: FONBET