Алматыдағы жаңа стадион УЕФА-ның төртінші санатына сай болады
Алматы дамыту орталығы 45 мың көрерменге арналған жаңа футбол стадионының жобасын таныстырды, деп хабарлайды Aladop.kz.
Аталған алаң УЕФА-ның төртінші санатының талаптарына жауап беретін болады.
Стадион Құлжа және Талғар трактілерінің бойында, шамамен 32 гектар жерде салынып жатыр. Негізгі алаңнан бөлек, жобада жаттығу алаңдары, командалар мен спортшыларға арналған үй-жайлар, жанкүйерлерге арналған аймақтар, заманауи қауіпсіздік жүйелері және маңайдағы аумақты абаттандыру қарастырылған.
Көлік қолжетімділігіне ерекше көңіл бөлінбек — ірі іс-шаралар өтетін күндері жол қозғалысын реттеу үшін объект маңында жол инфрақұрылымын дамыту жоспарлануда.
Еске сала кетейік, халықаралық деңгейдегі стадион салу жоспарлары туралы 2025 жылдың тамызында белгілі болған еді. Алғашында трибуналардың сыйымдылығы 35 мың орынға есептелген, кейінірек бұл көрсеткіш 45 мың орынға дейін ұлғайтылды.
Төртінші санат — УЕФА стадиондарды жіктеу жүйесіндегі ең жоғары деңгей. Осы талаптарға сәйкестік алаңға Еуропаның жетекші клубтық турнирлерінің матчтарын қабылдауға мүмкіндік береді. Құрылысты 2028 жылдың наурызында аяқтау жоспарлануда.
Біздің серіктес: FONBET