«Астана» жаңа инвесторға қатысты мәлімдеме жасады

Оның айтуынша, клуб жаңа инвестор тарту бағытындағы жұмыстарды жалғастырып жатыр, алайда келісімнің нақты мерзімі әзірге белгісіз. 

Хамитжанов клубтың күрделі қаржылық жағдайына қарамастан, басшылық мәселені шешудің жолдарын іздестіріп жатқанын атап өтті. Оның сөзінше, басты мақсат – бұрыннан жиналған міндеттемелерді орындаумен қатар, клубтың тұрақты жұмыс істеуіне және ұзақ мерзімді дамуына мүмкіндік беретін жүйе қалыптастыру.

«Астана» басшылығы әлеуетті инвесторға клубтың қаржылық жағдайы, спорттық мүмкіндіктері, міндеттемелері мен даму жоспары туралы қажетті ақпаратты ұсынған. Хамитжановтың айтуынша, тараптар арасындағы жұмыс диалогы жалғасып жатыр. Дегенмен түпкілікті шешім ресми рәсімделмейінше, инвестордың қашан келетіні туралы нақты мерзім айтуға болмайды. 

Клуб басшылығы жаңа инвестордың келуін жай ғана қаржыландыру көзі ретінде қарастырмайды. Хамитжанов «Астананың» басқару жүйесін реттеп, қаржылық тұрақтылықты қамтамасыз ететін және Қазақстанда ғана емес, Еуропада да жоғары мақсаттар қоюға мүмкіндік беретін жаңа даму кезеңін бастауды көздейтіндерін жеткізді.

Ол сондай-ақ команданың маусым қорытындысында үшінші орын алуының өзі қазіргі жағдайды ескергенде үлкен жетістік болатынын айтты. «Астана» басшысы клубтың әлеуеті зор екенін және қиындықтарға қарамастан, команда Қазақстандағы ең мықты ұжымдардың бірі болып қала беретінін атап өтті. 

Еске салайық, соңғы уақытта елордалық клуб қаржылық қиындықтарға тап болып, бірқатар жетекші футболшысынан айырылды. Сондай-ақ ойыншылардың жалақысы бойынша берешек мәселесі көтерілген еді. Қыркүйек айында футболшылар қарыздарды өтеуді талап етіп, талап орындалмаса, маусымның қалған матчтарына бойкот жариялау мүмкіндігін айтқан. Кейін клуб басшылығы құрылтайшылар мен Қазақстанның Туризм және спорт министрлігінің қолдауымен жағдайды реттегенін мәлімдеді.