“Атырау” клубы сатылымға шықты – Инвесторға қойылатын талаптар қандай?
Батыс Қазақстанның намысын қорғайтын "Атырау" клубы жекешелендіру бойынша сауда-саттыққа шығарылды, деп хабарлайды Aladop.kz.
Клубтың 100 пайыз үлесі үшін бастапқы баға 175,6 миллион теңге деп белгіленген.
Алайда, Match KZ хабарлауынша, жаңа қожайын клубты жай ғана сатып алып қоймай, бекітілген 27 тармақтан тұратын қатаң талаптарды орындауға міндеттеледі.
Инвесторға жүктелетін негізгі міндеттер:
Клубтың болашағы мен инфрақұрылымын дамыту мақсатында мынадай маңызды шарттар қойылып отыр:
– Футбол академиясын салу: Инвестор өз қаражаты есебінен құны 1 миллиард теңгеден кем болмайтын заманауи футбол академиясын тұрғызуы тиіс.
– Инфрақұрылымды сақтау: 8660 көрерменге арналған "Мұнайшы" стадионын тиісті деңгейде ұстап тұру және күтіп баптау.
– Әлеуметтік жауапкершілік: Алдағы үш жыл ішінде футбол орталығында кемінде 1000 баланы тегін оқыту. Сондай-ақ, клубтың негізгі құрамына жергілікті тәрбиеленушілерді жүйелі түрде тарту.
– Қаржылық ашықтық: Жыл сайын кіріс-шығыс бойынша аудиторлық тексерістен өтіп, мемлекеттік органдарға егжей-тегжейлі есеп беру.
– Брендті сақтау: Клубтың тарихи атауын, түстерін және эмблемасын құзырлы органдардың келісімінсіз өзгертуге қатаң тыйым салынады.
Бұл қадам клубты тек бизнес нысаны ретінде емес, аймақтық футболдың даму орталығы ретінде сақтап қалуды көздейді.
Біздің серіктес: FONBET