ХІІ турға дейін Қазақстан чемпионатының жоғарғы топтарында 4999 матч ойналыпты. Енді «бес мыңыншы (5 000) тарихи матч қай командалар арасында өтеді?» деген сұрақ туындауда.
Осының анық-қанығын білу үшін егжей-тегжей ел футболының статистикасын жүргізіп жүрген, көпшілікке танымал әріптесіміз Михаил Маркинге жүгінген едік.
– 1992 жылы 19 сәуір күні «Қайрат» – «Актюбинец» командалары арасындағы ойынмен Қазақстанның тәуелсіз чемпионаттарының пердесі түрілген. Ел чемпионатының тырнақалды кездесуінде «Қайрат» 3:1 есебімен жеңіске жеткен-ді. Содан бері толық емес 20 маусым бойы, яғни бүгінге дейін, 4999 матч ойналды. Бес мыңыншы ойын 2011 жылғы маусымның 13-турына дөп келіп отыр. Мен бес мыңыншы матч «Қайрат» – «Ақтөбе» арасындағы кездесу деп есептеймін. Өйткені өмірдің өзі осыған келтіріп тұр. Алматылықтар мен ақтөбеліктердің екеуара алты рет ел чемпионы болғандарын ескерген жөн, – деді күні бүгінге дейін «Қайрат» футбол клубының құрамында жұмыс істейтін әріптесіміз.
Қазақстан футбол федерациясының сайтына қарасаңыздар, ХІІІ турдың үш ойыны сағат 18:00-де басталады да, қалған үшеуінің ысқырығы бір сағаттан кейін безілдейді. Алматыдағы, Өскемендегі және Қызылордадағы ойындар сағат тілі тікесінен тік тұрғанда (төменгі тілі 6-ны, ал жоғарғы тілі 12-ні көрсеткенде) басталады екен. Алайда Қазақстан футбол федерациясы бес мыңыншы матчты осы үш кездесу арасында көкпарға салмай, бір шешімін шығарар. Бес мыңыншы матчтың 19 жылдан кейін Алатау бөктерінде өтетіндігін қарастыру керек сияқты.