Болжам. Сарри қызметінен кетуі мүмкін

Болжам беруші үшін бұл өте жақсы статистика. Сонымен қатар, "Милан" - "Болония" арасындағы ойынның есебін тапқан бір оқырманымыз бар. Есептің 5-1 болатынын табу әлбетте ерекшелеп айтуды талап етеді. Байжан есімді оқырманымызға ду қол шапалақ.

Ал бүгін оқырмандарымызға "Ювентус" - "Лацио" ойынының есебін дәл табуды сұранамыз. Кім есепті бірінші болып дәл тапса, оның есімі келесі жазбамызда болады. Тіпті оқырман өзінің фотосын жіберсе оны да салуға уәде береміз.

"Брайтон" - "Ньюкасл"

"Брайтон" АПЛдегі орнын сақтап қалу үшін "Ньюкаслмен" тең ойнаса жеткілікті. 38 ұпай болса ешкім жете алмайды. "Ньюкаслдың" қазір аса қатты мотивациясы жоқ. Тек шабуылдағы ойыншылары тұрақты түрде гол салады. Сонысы ұнайды. Бірақ, букмекерлік кеңселер бірдеңені сезгендей "Брайтон" жеңеді деп сенімді отыр. Коэфиценттерді азайтып тастапты. Англияда келісілген матч ойнау өте қиын екенін білеміз. Сондықтан осы матчта мен "Ньюкасл" гол салады деген бәсті таңдадым. Сосын, жалпы матч тоталы 2 ден көп болады деген бәстің коэфицентіне қызықтым.

"Вулверхэмптон" - "Кристал Пэлас"

"Кристал Пэласта" кадр мәселесі бар. Кристиан Бентеке алаңға шыға алмайды. Оған Ван Анхолт, Кэйхилл, Томкинс пен Миливоевичтерді қосыңыз. "Вулверхэмптонда" барлығы сақадай сай. Бүгін өз алаңында жеңсе "қасқырлар" 6-орынға көтеріліп, Мауриньо баптайтын команданы 7-орынға сырғытады. Демек, португалдардан жасақталған бұл команда португал бапкерінің командасын орнына қоймақшы. Демек, "Вулверхэмптонның" жеңісі. 1,5 коэф.

"Ювентус" - "Лацио"

Осы матчта ұпай жоғалтса Маурицио Сарри қызметінен кетеді депті басшылық. "Ювентус" соңғы матчтарды әупірімдеп тең ойнап жүр. Жағдайы қиын. Чемпиондықтан да айырылып қала ма деген ойлар пайда болды. Осы бір әңгімелер "Ювеге" психологиялық шабуыл болып тұрғаны анық. "Лационың" жағдайы да осындай болды. Бірақ олар ендігі ол қысымнан өтіп кетті. Чемпиондықтан үміті болғанымен, қазір ешкім сене қоймас. Ол команда үшін жақсы. Бірақ, "Удинеземен" тең ойнаған соң жанкүйерлер қоя салыңдар дегендей қылды. Иммобиле мен Кайседоның гол салар түрі жоқ. Қайта жас бала Адекание жақсы көрініп жүр. Мына матчта ары кетсе "екі команда гол салар" басқа не болжам айтамыз, қиын. "Юве" адам болудың жайын ойлап, жеңетін шығар.