Дастан Сәтпаев Қайрат Боранбаевты алдады

Боранбаевтың айтуынша, шабуылшы Чемпиондар лигасында алаңға шығуды қатты қалағаны соншалық, өз денсаулығындағы мәселелерді клубқа да, дәрігерлерге де ашып айтпаған:

“Өкінішке қарай, ол бізге ауырсыну сезіп жүргенін айтпады. Чемпиондар лигасында ойнауды қатты қалағандықтан, жарақатын жасырып жүрді.” – деді Боранбаев.

Тек соңғы ойынынан кейін ғана Сәтпаев өз жағдайы туралы хабарлаған. Бұдан кейін “Қайрат” медициналық тексеру нәтижелерін дереу ұлттық құраманың дәрігерлеріне жолдаған:

“Соңғы матчтан кейін ғана Дастан мәселе бар екенін айтты. Біз оны тексерістен өткіздік, барлық мәліметті құраманың дәрігерлеріне жібердік. Олар оны Астанаға шақырып, қарап, жарақаттың бар екенін растады." – деді ол.

Боранбаев сонымен қатар, не себепті Сәтпаев біраз уақыттан соң қайта алаңға шыққанын да түсіндірді:

“Кейін ол жарақаттан кейін неге ойнады? деген сұрақтар туындады. Иә, ол шынында ойнады, өйткені екі апта өтіп, жағдайы жақсарған болатын.”  – деді “Қайрат” басшысы.