«Елімай» бас бапкерімен қош айтысуы мүмкін. Карповичтің орнына басты кандидат та дайын екен
«Елімайдың» бас бапкері Андрей Карпович жақын арада қызметінен кетуі ықтимал. Семейлік ұжым алдағы 9-тур аясында болатын «Қайратқа» қарсы ойында жеңілсе, бапкерлік құрам толық ауыспақ.
Ал Андрей Карповичтің орнына басты үміткер жуырда «Ертістен» кеткен Қайрат Нұрдаулетов болып отыр. Бұл туралы Meta-ratings.kz порталы мәлімдеді.
«Семейлік клубқа жақын дереккөздің ақпаратына сай, Абай облысының әкімі Берік Уәли команданың соңғы нәтижелеріне риза емес. Сондай-ақ, клуб басшылығы кей ойыншылардың жанын салмай өнер көрсететініне де алаңдаулы. Алда ҚПЛ-дің аясындағы «Қайратқа» қарсы кездесуде Карповичтің тағдыры шешілуі мүмкін», - делінген портал материалында.
Айта кетейік, «Елімай» соңғы үш ойында жеңіліс тапты – премьер-лигада «Оқжетпестен» 0:2, «Ақтөбеден» 0:1 және кеше Қазақстан Кубогінің ширек финалында «Қызыл-Жардан» ұтылды. ҚПЛ-де семейлік клуб 8 турдан кейін 13 ұпаймен жетінші орында келеді.
Біздің серіктес: FONBET