Эльхан Астанов “Астанаға” қарсы ойында неге алаңға шықпады?
“Ордабасы” көшбасшысы “Астанаға” қарсы ойынға қатыспауының себебін түсіндірді, деп хабарлайды Aladop.kz.
Шымкенттік “Ордабасының” шабуыл шебіндегі басты күші Эльхан Астановтың “Астанаға” қарсы маңызды матчта көрінбеуі жанкүйерлер арасында түрлі қауесет тудырған еді. Көпшілік футболшы жарақат алып қалды ма деп алаңдаса, енді бірі мұны тактикалық шешімге балаған. Алайда, шындық әлдеқайда қарапайым болып шықты.
Legalbet.kz тілшісіне берген сұхбатында Қазақстан құрамасының ойыншысы жағдайды нақты түсіндірді. Барлық мәселе — футболшы мен елордалық клуб арасындағы құқықтық міндеттемелерде.
“Әрине, мен бұл матчты “Астанамен” жасалған жалға алу келісімшартының шарттарына байланысты өткізіп алдым. Кез келген адам тексере алады — менің келісімшартым әлі де соларға тиесілі. Мен мұнда жалда жүрмін, оны ешкім жасырған жоқ. Келісімде “Астанаға” қарсы ойнай алмайтыным туралы арнайы тармақ бар.” — деді Астанов.
Эльханның айтуынша, оның “Ордабасыдағы” жалдау мерзімі де, “Астанамен” жасалған негізгі келісімшарты да биылғы маусымның соңында аяқталады. Демек, жыл соңында ол еркін агент атанып, жаңа клубты өз бетінше таңдау мүмкіндігіне ие болады.
Дегенмен, жанкүйерлерді тағы бір сұрақ мазалайды: “Астана” құрамында ойыншы тапшылығы туындаса, оны маусым ортасында кері шақыртып ала ала ма? Футболшының жауабы:
“Шынымды айтсам, клубтың мені мерзімінен бұрын қайтарып алу құқығы бар-жоғын білмеймін."
Біздің серіктес: FONBET