Эрлинг Холанд Чемпиондар лигасында 50 голға ең жылдам жеткен футболшы

25 жасында-ақ ол Чемпиондар лигасының үздік мергендерінің алғашқы ондығына кірді. Бұл жас футболшы үшін теңдессіз жетістік.

Холандтың Еуропадағы ертегідей жолы 2019 жылы "Зальцбургте" басталды. Сол жылы ол дебютінде-ақ "Генктің” қақпасына бірінші таймда хет-трик жасап, турнир тарихында мұны орындаған тұңғыш футболшы болды. Алғашқы бес ойында сегіз гол соғып, бұл көрсеткішке жеткен төртінші ойыншы атанды (Алессандро Дель Пьеро, Диего Коста, Себастьян Аллерден кейін).

2019/20 маусымының топтық кезеңінен соң ол "Боруссия Дортмундқа” ауысып, алғашқы ойында-ақ қос гол соғып, небәрі жеті матчта Чемпиондар лигасында он голға жеткен ең жылдам ойыншы болды.

Холанд кейін де рекордтарды бірінен соң бірін жаңартты:

15 голды 12 матчта,

20 голды 14 матчта,

25 голды 20 матчта,

30 голды 25 матчта,

35 голды 27 матчта соқты.

Сонымен қатар ол бұл межелердің бәріне жеткен ең жас ойыншы болды. 2023/24 маусымында "Лейпцигке" қарсы ойында 35 матчта 40 голға жетіп, тағы да рекорд орнатты. Ал 2025/26 маусымының алғашқы турында "Наполиге” соққан голы оның Чемпиондар лигасындағы 50-інші добы болып тіркелді.

Холанд турнирде 24 түрлі командаға қарсы ойнаған, оның 18-іне гол соққан. Ең көп голын бельгиялық клубтарға қарсы соқса, "Севильяның” өзіне үш кездесуде алты доп кіргізген.

Ол екі рет хет-трик жасаған. Алғашқысы – дебютінде, ал екіншісі – 2023 жылы "Лейпцигке” қарсы ойында бір матчта бес гол соғып, Чемпиондар лигасы тарихындағы мұндай жетістікке жеткен үшінші ойыншы болды.

Эрлинг Холандтың негізгі рекордтары:

• Чемпиондар лигасында 15, 20, 25, 30, 35, 40, 45 және 50 голға жеткен ең жас және ең жылдам ойыншы
• Турнир тарихында дебютінде бірінші таймда хет-трик жасаған жалғыз ойыншы
• Үш түрлі клуб үшін дебютінде бірден екі және одан да көп гол соққан жалғыз футболшы
• Чемпиондар лигасында қатарынан төрт матчта дубль жасаған алғашқы ойыншы

Эрлинг Холанд Чемпиондар лигасының үздік мергендеріне тән тұрақтылық танытып келеді. "Манчестер Сити” мен Пеп Гвардиола оның гол соғу мүмкіндігін барынша пайдаланып, әлем футболындағы басты бомбардирге айналдыруда.