«Ертіске» жыл сайын 1,5 миллиард теңге инвестиция құйылады: клубтың жаңа инвесторлары белгілі болды

Жаңа келісімге сәйкес, «Ертіске» жыл сайын кемінде 1,5 миллиард теңге инвестиция тарту жоспарланып отыр.

Клубтың жаңа инвесторлары кімдер?

Павлодарлық клуб жеке инвесторлармен ынтымақтастық туралы меморандумға қол қойды.

Келісім бойынша қаржыландыруға үш компания қатысады:

● «Павлодар өзен порты» АҚ — 50%;

● «RR-CAPITAL» ЖШС — 25%;

● «Біріккен жеміс-көкөніс компаниясы» ЖШС — 25%.

Осылайша, «Ертіс» кәсіби команданы қаржыландыруда жеке инвестицияларға сүйенетін жаңа басқару үлгісіне көшті.

Ал мемлекет балалар мен әйелдер футболын дамытуға қолдау көрсетуді жалғастырады.

Бұл өзгерістер Қазақстан Президенті Қасым-Жомарт Тоқаевтың кәсіби футбол клубтарын коммерцияландыру жөніндегі тапсырмасы аясында жүзеге асырылып отыр.

Клубтың ресми мәліметіне сәйкес, биыл «Ертісті» қолдауға демеушілік қаражат есебінен 250 миллион теңге бағытталған. Жыл соңына дейін тағы 250 миллион теңге бөлу жоспарланып отыр.

Жаңа инвесторлар клубтың инфрақұрылымын дамытуға, негізгі құрамды күшейтуге және жас футболшыларды даярлауға қаржы салуды көздеп отыр.

«Ертіс» соңғы жылдары күрделі кезеңдерді бастан өткерді. 2020 жылдың мамыр айында қаржылық қиындықтарға байланысты команда Қазақстан чемпионатынан шығып қалды. Ал 2022 жылы клуб банкрот деп танылды.

2023 жылы Павлодарлық команданы қайта қалпына келтіру жұмыстары басталды. Бір жылдан кейін «Ертіс» кәсіби футболға оралып, Екінші лигада өнер көрсетті. 2025 жылы Бірінші лигада екінші орын алып, Қазақстан Премьер лигасына жолдама жеңіп алды.

Осылайша, тарихи клуб небәрі екі маусым ішінде төменгі дивизионнан ел чемпионатының жоғары деңгейіне қайта көтерілді.

Павлодар облысында футбол инфрақұрылымын дамытуға да ерекше көңіл бөлінбек. Жарияланған жоспарға сәйкес, 2028 жылы өңірде 25 мың көрерменге арналған заманауи стадион салу көзделіп отыр.

Сонымен қатар 2027 жылы мемлекеттік-жекеменшік әріптестік аясында 200 жас футболшы білім алып, жаттыға алатын академия ашу жоспарланған.

Қазақстан Премьер лигасына қайта оралған алғашқы маусымында Павлодарлық клуб 32 ұпай жинап, турнирлік кестеде 12-орынға тұрақтады.

Клуб басшылығы ендігі мақсат ретінде команда құрамын күшейтуді, жас ойыншыларды дамытуды және Премьер лигадағы орнын нығайтуды белгілеп отыр.

Жеке инвесторлардың келуі «Ертістің» қаржылық тұрақтылығын арттыруға бағытталған маңызды қадам саналады.

Енді клубтың басты міндеті — жаңа қаржыландыру мүмкіндіктерін тиімді пайдаланып, Қазақстан футболындағы бұрынғы беделін қайта қалпына келтіру.