Фарер аралдары – Қазақстан: 2025 жылғы соңғы матч алдындағы талдау

Матч бүгін Астана уақытымен 22:00-де Хорватияның Пула қаласындағы “Aldo Drosina” стадионында өтеді. 

Фарер аралдарының жағдайы

Фарер аралдары әлем чемпионатына іріктеу кезеңін жақсы бастады. Маусым мен қазан айлары арасында қатарынан үш рет жеңіске жетіп, (Гибралтар, Черногория және Чехияны жеңді) топтың екінші орнына бір-ақ ұпай жетпей тұрды.

Алайда шешуші сәтте жолдары болмады. Соңғы турда Хорватияға қонаққа барған Эйдун Клакстейннің шәкірттері 3:1 есебімен ұтылды. Ерте гол соққанымен, Хорваттар басым екенін көрсетті.

• Геца Давид Тури алғашқы болып есеп ашты
• Бірақ көп ұзамай Гвардиол таразы басын теңестірді
• Кейін Петар Муса мен Никола Влашич жеңісті Хорватияға алып келді

Сонымен, Фарер аралдары өздерінің тарихи мүмкіндігін жіберіп алды. Дегенмен 8 матчта 13 ұпай жинап, төрт жеңіске қол жеткізгені – олар үшін есте қаларлық кезең болды. Енді команда жылды жеңіспен аяқтауды көздеп отыр.

Құрамда бірнеше маңызды ойыншы жоқ:

• Халлур Ханссон мен Брандур Хендрикссон жарақатына байланысты шақырылмады,
• Қорғаушы Йоаннес Даниелсен де тізімде жоқ.

Ал шабуыл шебінде 34 жастағы тәжірибелі Йоан Симуэн Эдмундссон (құрама сапында 100-матчқа жақын) бастапқы құрамға оралуы мүмкін. Таяуда алғашқы голын соққан Геза Давид Тури де негізгі ойыншылардың бірі болады.

Қазақстан құрамасының жағдайы

Қазақстан құрамасы да әлем чемпионатының екінші кезеңіне өтуден қағылды. 8 матчта 8 ұпай жинаған “Қырандар” топты төртінші орында аяқтады. Қиындыққа қарамастан, соңғы нәтижелер көңілге үміт ұялатты.

• Лихтенштейнді 4:0 есебімен тас-талқан етті,
• Солтүстік Македониямен сырт алаңда 1:1 тең ойнап, бір ұпай алды,
• Ал ең соңы – топ жеңімпазы Бельгиямен 1:1.

Бұл ойында Қазақстанды небәрі 17 жастағы Дастан Сәтпаев алға шығарғаны бәріне белгілі, жас шабуылшы ұлттық құрамадағы алғашқы голын Селстің қақпасына осылайша соқты. Ислам Чесноков қызыл алғанымен, оның жазасы тек ресми матчтарға қолданылады, сондықтан Фарерге қарсы ойында алаңға шыға алады.

Қазақстан құрамасында да бірнеше негізгі ойыншы жоқ:

• Исламбек Қуат
• Бахтиер Зайнутдинов

Уақытша бас бапкер Талғат Байсуфинов жас ойыншыларға сенім артып жатыр. Сәтпаев алдыңғы шепте тағы да негізгі үміткер болса, оның артында Максим Самородов, Ғалымжан Кенжебектер ойнайды.

Фарер аралдары – жанкүйерлерінің алдында жылды сәтті аяқтауды қалайтын, физикалық тұрғыдан мықты, тәртіпті команда.

Қазақстан – соңғы ойындарда ұйымшылдық көрсетіп, Еуропаның мықты құрамаларына қарсы лайықты деңгейде ойнауда.

Екі команда да ресми ойындардан шаршағанымен, жас футболшыларға сенім артып, жаңа жоспарларын сынап көруге ниетті.