ФИФА клубтық әлем чемпионатын екі жыл сайын өткізуді қарастыруда
ФИФА 2029 жылдан бастап клубтық әлем чемпионатын төрт жылда бір рет емес, екі жыл сайын өткізу мүмкіндігін талқылап жатыр. Сонымен қатар, турнирге қатысатын командалар санын қазіргі 32-ден 48-ге дейін көбейту мәселесі де қаралуда.
Ағымдағы регламент бойынша келесі клубтық әлем чемпионаты 2029 жылы өтеді. Биыл жазда АҚШ-та тұңғыш рет 32 команда қатысатын жаңа форматтағы турнир өтеді. Дегенмен, «Реал Мадрид» бастаған бірқатар алдыңғы қатарлы клубтар ФИФА-ға турнирді екі жыл сайын өткізу жөнінде ұсыныс жасаған. Бұл бастаманы «Барселона», «Манчестер Юнайтед», «Ливерпуль» және «Наполи» секілді клубтар қолдады.
ФИФА-ның шешімі еуропалық футбол құрылымымен қайшылыққа әкелуі мүмкін. Премьер-лига басшылығы мен УЕФА турнирдің жиі өткізілуі ойыншылардың жүктемесін арттырып, ұлттық және еуропалық жарыстардың кестесіне кері әсер етеді деп алаңдаулы. Премьер-лига атқарушы директоры Ричард Мастерс ФИФА-ны турнир кестесін бекіту барысында лигалар мен ойыншылардың пікірін ескермеді деп сынға алды.
Сонымен қатар, ФИФА 2029 жылғы турнирге іріктеу ережелерін қайта қарастыруы мүмкін. Қазіргі шектеу бойынша бір елден екіден артық клуб қатыса алмайды. Бұл шектеудің алынуы Англия немесе Испания сияқты алдыңғы қатарлы чемпионаттардан бірнеше клубтың бір мезгілде қатысуына жол ашуы ықтимал.
ФИФА турнирді өткізу құқығын бөлу бойынша да ашық конкурс жарияламақ. 2029 жылғы жарысты өткізуге Катар, Испания және Марокко қызығушылық танытып отыр.
Біздің серіктес: FONBET