Жарнама
Жарнама

Гуцуляктың «Ордабасыға» ауысуы Украинада дау туғызды: миллион еуролық жалақы ма, әлде ұлттық құрамамен қоштасу ма?

15.11.2026, 08:12

Украина құрамасының футболшысы Алексей Гуцуляктың Шымкенттік «Ордабасы» клубына ауысуы өз елінде қызу талқыға түсті. Украиналық журналистер ойыншының Қазақстан Премьер лигасын таңдауына күмәнмен қарап, бұл шешім оның құрамадағы болашағына кері әсер етуі мүмкін екенін айтуда, деп хабарлайды Aladop.kz.

Жарнама
Жарнама

Негізгі сын — футболшының мансабының кемеліне келген шағында Еуропада өнер көрсету мүмкіндігін пайдаланбай, Қазақстан чемпионатына ауысуы.

«Ұлттық құрамадағы болашағына нүкте қойды»

2025 жылы Алексей Гуцуляк бес гол соғып, Украина ұлттық құрамасының үздік сұрмергені атанған болатын.

Алайда танымал Украиналық журналист Виктор Вацко футболшының «Ордабасыға» ауысуы оның ұлттық құрамадағы мүмкіндіктерін айтарлықтай төмендетеді деп есептейді.

«Қазақстан чемпионатынан Украина құрамасына шақырту алу мүмкін емес. Ол құрамадағы болашағына нүкте қойды. Бұл — оның таңдауы», — деді Вацко.

Журналистің пікірінше, Қазақстан чемпионатындағы өнер футболшының халықаралық деңгейдегі бәсекеге қабілеттілігін сақтап қалуына жеткіліксіз болуы мүмкін.

Дегенмен бұл — журналистің жеке бағасы. Гуцуляктың Украина құрамасына алдағы уақытта шақырылатыны немесе шақырылмайтыны жөнінде ресми шешім жарияланған жоқ.

Еуропалық клубтардың қызығушылығы қайда қалды?

Украинада футболшының агенті Олег Авдыш та сынға ұшырап отыр. Бұған дейін агент Гуцулякқа Түркия, Біріккен Араб Әмірліктері және Еуропаның жетекші бес чемпионатындағы клубтар қызығушылық танытқанын мәлімдеген.

Алайда футболшының түпкілікті таңдауы шымкенттік «Ордабасыға» түсті. Осы жағдай Украиналық футбол қоғамдастығында түрлі сұрақ туғызды. Атап айтқанда, неліктен Еуропа клубтарына ауысу мүмкіндігі туралы айтылған ойыншы Қазақстан чемпионатын таңдады деген мәселе талқылануда.

Украиналық журналист Михаил Спиваковский трансфердің басты себептерінің бірі қаржылық ұсыныс болуы мүмкін екенін айтты. Оның болжамынша, Алексей Гуцуляктың «Ордабасыдағы» жылдық жалақысы бір миллион еуродан асуы ықтимал.

«Гуцуляк — соңғы жылдардағы Украина құрамасының үздік ойыншыларының бірі әрі Украина чемпионатындағы соңғы үш-төрт маусымның ең мықты футболшыларының қатарында. Бірақ ол Еуропада ойнау мүмкіндігін жіберіп алды», — деді Спиваковский.

Журналист футболшының Шымкенттегі табысы туралы да пікір білдірді.

«Алексейдің Шымкентте жылына бір жарым миллион еуро алатынын білмеймін. Бірақ оның жалақысы алты нөлден тұратын сома деп ойлаймын. Гуцуляк пен оның агенті Авдыштың «Ордабасымен» болмашы ақшаға келісімшарт жасасқанына сенбеймін», — деді ол.

Айта кетейік, бұл мәліметтер журналистің болжамына негізделген. «Ордабасы» клубы футболшының нақты жалақысын ресми түрде жариялаған жоқ.

Михаил Спиваковский Шымкенттік клубтың Украина трансфер нарығындағы белсенділігі мұнымен аяқталмайды деп есептейді.

«Менің ойымша, алдағы бір-екі маусымда «Ордабасыға» ауысатын Украиналық футболшылардың соңғысы Гуцуляк болмайды», — деді журналист.

Жарнама
Жарнама

Новости партнеров