Карим Бензема “Фенербахчеге” келе ме? Түркия алыптары Франциялық жұлдызбен келіссөз жүргізуге дайын
Түркияның әйгілі “Фенербахче” клубы шабуыл шебін күшейту мақсатында жаңа жұлдыз ойыншымен келісім жасамақ. Fotomaç басылымының хабарлауынша, клубтың басты нысанасы — форвард Карим Бензема.
Бас бапкер Доменико Тедеско команда президенті Садеттин Саранға жаңа шабуылшы қажет екенін жеткізген. Бұл шешімге Юссеф Эн-Несиридің тұрақсыз ойыны, Джон Дуранның жарақаты және Джанк Тосунның құрамнан шеттетілуі себеп болған.
Кандидаттардың ішінен негізгі таңдау дәл Бенземаға түскен. Себебі 37 жастағы ойыншының қазіргі клубы “Аль-Иттихадпен” келісімшарты маусым соңында аяқталады. Бұл жағдай Түрік клубының трансферді жүзеге асыруына қолайлы мүмкіндік беріп отыр.
Хабарларға сенсек, “Фенербахче” басшылығы алдағы апталарда Бенземаның агенттерімен тікелей байланыс орнатпақ. Егер келіссөздер сәтті өтсе, трансфер ресми түрде жүзеге асады.
Өзі де жуырда берген сұхбатында Бензема карьерасының соңғы кезеңін Еуропада өткізгісі келетінін айтқан еді. Сондықтан бұл келісім “Фенербахче” үшін тарихи мүмкіндік болмақ.
Түркиялық БАҚ-тың пікірінше, егер Бензема Стамбулға ауысса, ол клуб тарихындағы ең беделді шабуылшылардың бірі болмақ. Әзірге келіссөздер басталмағанымен, “Фенербахче” бұл бағыттағы ұстанымынан қайтпай отыр.
Біздің серіктес: FONBET