Қазақ футболының инфрақұрылымы – Стадион мәселесі және даму болашағы
"Бірінші бол" подкастының кезекті шығарылымында Қазақстан футболындағы ең өзекті мәселелердің бірі — стадиондардың жай-күйі мен инфрақұрылымдық дағдарыс талқыланды, деп хабарлайды Aladop.kz.
Студия қонағы, ҚФФ Кәсіби клубтар арасындағы жарыстарды өткізу дирекциясының басшысы Ержан Мұсабеков еліміздегі футбол нысандарының қазіргі жағдайы мен алдағы жоспарлар туралы маңызды ақпараттармен бөлісті.
Биылғы Қазақстан Премьер лигасында 16 команда бақ сынап жатыр, алайда олардың басым бөлігінде өз алаңында ойнау мүмкіндігі жоқ. Көптеген клубтар көрші облыстардың стадиондарын жалдап, көшпелі ойындар өткізуге мәжбүр. Бұл жағдай тек қаржылық шығынды ғана емес, жанкүйерлердің де қызығушылығын төмендетеді.
Әсіресе, "Атырау” мен "Каспий" клубтарының алаңдары УЕФА мен лиганың қойған талаптарына сай келмейді. Дегенмен, бұл бағытта оң өзгерістер де жоқ емес.
– Атырауда қазіргі таңда үш бірдей стадионның құрылысы мен жөндеу жұмыстары жүріп жатыр.
– Ақтаудағы стадионды да жаңарту жоспарланған.
– Ұлытау өңірінде соңғы екі жылда инфрақұрылымды жақсарту бойынша ауқымды жұмыс атқарылған.
Ержан Мұсабековтің айтуынша, УЕФА-ның стадиондарға қоятын 5 негізгі критерийі бар. Жақында УЕФА-дан арнайы маман келіп, Қазақстандағы футбол нысандарын тексеріп қайтқан. Тексеріс барысында кейбір алаңдардың сапасы көңіл көншітпегенімен, елімізде футбол алаңдарына қатысты ресми ұлттық стандарттар бекітілген.
Инфрақұрылымның нашарлығы тек ойынға ғана емес, футболдың көрінісіне де әсер етеді. Трансляцияның сапасы тікелей стадионның техникалық жабдықталуына байланысты.
Қазақ футболы тек негізгі стадиондарды ғана емес, балалар футболын да назардан тыс қалдырмақ емес. Қазіргі таңда:
– Еліміздің 8 өңірінде жаңа стадиондар салынуда.
– Қызылорда мен Қарағандыда заманауи футбол академияларының құрылысы жүріп жатыр.
– Бірінші лиганың матчтары келесі жылдан бастап жұмыс күндерінен демалыс күндеріне ауыстырылады деп жоспарлануда.
Сонымен қатар, тамыз айында Ақтөбеде Чемпиондар лигасының алғашқы раунды өтетіні хабарланды, бұл өңірдегі футбол инфрақұрылымының халықаралық деңгейдегі сынағы болмақ.
Қазақ футболының болашағы тікелей инфрақұрылымның сапасына байланысты. Инвесторларды тарту, трансляция сапасын жақсарту және жасанды алаңдардан бас тарту мәселелері шешілгенде ғана отандық футболдың деңгейі жаңа биікке көтерілмек. Подкастта айтылғандай, қазіргі басты мақсат — әр облыста талапқа сай келетін заманауи футбол кешендерін қалыптастыру.
Біздің серіктес: FONBET