Қазақстандық футболшы «Галатасараймен» келісімшартқа отырды

17 жастағы Қазақстандық қорғаушы Джан Ходжаоглу Ыстамбұлдың «Галатасарай» клубының жүйесіне ресми түрде қосылды. 

ASnews.kz сайтының мәліметінше, жас талант бір айға жуық созылған сынақтан кейін клубтың U-19 командасының сапына қабылданды.

Ходжаоглу Түрік клубының назарына өзінің ойын көрсетілімдері жазылған бейнебаяндар мен Қазақстанның U-17 құрамасындағы өнері арқылы ілікті. Ол небәрі төртінші жаттығудан кейін-ақ мамандарды өз қабілетіне сендіре білген.

Футболшының айтуынша, сынақ кезінде әр жаттығуды төрт скаут бақылап, үлкен психологиялық қысым көрсеткен. Джан бала кезінен осы Ыстамбұл клубының жанкүйері болғандықтан, бұл ауысу ол үшін өте эмоционалды сәт болды. Енді оның негізгі құрам футболшыларымен бірге жаттығуға мүмкіндігі бар.

«Галатасарай» бапкерлер штабы Қазақстандықты тек қорғаушы ретінде емес, тірек жартылай қорғаушы ретінде де қарастыруда. 

Түркияға көшпес бұрын Ходжаоглу Швейцарияның «Сьон» клубында ойнап, 10 матчқа қатысқан.

Футболшы маусым алдындағы дайындықты өткізіп алғандықтан, оған физикалық бабын қалыпқа келтіру үшін шамамен бір жарым ай уақыт берілді. Осы мақсатта ол жеке жаттықтырушылармен қосымша жұмыс істеуді жоспарлап отыр.

Айта кетейік, «Галатасарай» U-19 командасы қазіргі таңда турнирлік кестеде көш бастап тұр. Осы дивизионда тағы екі қазақстандық өнер көрсетеді: «Бешикташ» сапында Аламгир Смаков және «Аланьяспорда» Диярхан Карабалинов бар.