Қазақтың Зиданы Португалияда – Афуан Дәулетұлы тарихи келісімшартқа отырды

Осы уақытқа дейін отандастарымыз тек жастар жобаларында бой көрсетсе, бұл жолы Афуан Дәулетұлы Португалияның ересектер клубымен кәсіби келісімшартқа отырған тұңғыш Қазақстандық футболшы атанды.

Жаңа белес және "Атлетико Малвейра"

31 желтоқсанда 19 жасқа толған талантты жартылай қорғаушы Лиссабоннан 40 шақырым жердегі Мафра қаласының "Атлетико Малвейра" клубымен келісімшартын бекітті. Дядя Ваня телеграм арнасы бұл трансфердің мән-жайын білу үшін Португалияға хабарласып, қызықты деректермен бөлісті.

Паулу Барбоза мен "жас Зидан"

Афуанның мүддесін әлемге әйгілі футбол агенті Паулу Барбоза қорғайды. Кезінде Алексей Смертинді "Челсиге" ауыстырған тәжірибелі маман қазақ баласының талантына тәнті болғанын жасырмады.

"Мен Афуанды осыдан үш жыл бұрын байқағанмын. Ол өте техникалы, ойынды керемет оқиды. Оң аяқты болса да, сол аяғымен нәзік пас шығарып, дәл соққы бағыттай алады. Оның ойын мәнері маған жас кезіндегі Зинедин Зиданды еске түсіреді.” — дейді Барбоза.

Еуропалық мектептің түлегі

Бір қызығы, Афуан – жүз пайыз Еуропалық футболдың тәрбиеленушісі. Ол алғашқы қадамдарын атақты Георге Хаджидің академиясында бастап, кейін ата-анасының жұмысына байланысты Португалияға қоныс аударған. Лиссабонның үздік жасөспірімдер клубтарында шыңдалған ол бүгінде кәсіби деңгейге көтерілді.

Неге 4-ші дивизион?

Афуанға Шығыс Еуропаның элиталық дивизиондарынан да ұсыныстар түскен. Алайда ол агентімен ақылдаса отырып, даму үшін "Атлетико Малвейраны" таңдаған. Клубпен келісімшарт 1+1 жүйесі бойынша жасалды.

• Клубтың ерекшелігі: 80 жылдық тарихы бар бұл команда таланттарды іріктеп, оларды ересектер футболына бейімдеп, кейін Еуропаның алпауыт клубтарына сатумен айналысады.

• Танымал түлектері: Португалия құрамасының бұрынғы қорғаушысы Марку Канейра мен Еуропа чемпионы Вильям Карвалью осы мектептен өткен.

Болашаққа трамплин

Паулу Барбозаның айтуынша, Португалияның 4-ші дивизионында бәсекелестік өте жоғары. Афуан үшін қазір ең бастысы – тұрақты ойын практикасы.

"Португал футболының басты ерекшелігі – жеке техника мен тактикалық тәртіптің ұштасуы. Афуанға ересектер футболына бейімделу үшін көп ойнау керек. Содан кейін ғана Португалияның Примейра лигасына немесе Еуропаның басқа да алпауыт чемпионаттарына жол ашылады.” — деп түйіндеді агент.