ҚФФ 3 миллион теңгеге мойын орамалдарын сатып алады
Қазақстан футбол федерациясы "KAZAKHSTAN" жазуы және федерация логотипі бейнеленген имидждік мойын орамалдарын сатып алмақ. Бұл туралы мемлекеттік сатып алулар порталында жарияланған ресми мәліметтерде көрсетілген.
Жалпы сомасы 3 миллион теңгеге 1000 дана шарф сатып алынбақ. Тапсырыс беруші ретінде ҚФФ-ның операциялық департаменті көрсетілген.
Шарфтар акрил жібінен тоқылып, өлшемі 145 × 20 см болады. Дизайны екі жақты, бір жағында "KAZAKHSTAN" жазуы, екінші жағында федерация логотипі болады. Негізгі фоны ұлттық құраманың ойын формасының үлгісіне ұқсастырылып жасалады.
Сонымен қатар, әр шарфқа 20 × 30 см өлшеміндегі этикетка қоса тіркеліп, ламинацияланған картоннан дайындалады.
Жеткізу мерзімі келісімшарт жасалып, алдын ала төлем жүргізілгеннен кейін 35 күннің ішінде жүзеге асырылуы тиіс.
Біздің серіктес: FONBET