“Хартс” бапкері Ислам Чесноковтың ойынына тәнті: “Ол маусымның шешуші кезеңінде басты көзіріміз болады”

Бас бапкердің айтуынша, Ислам күн өткен сайын бабына еніп, команданың маңызды бөлшегіне айналып келеді.

Макиннес футболшының жаттығу кезіндегі ынтасы мен алаңдағы белсенділігін ерекше атап өтті:

"Исламның қазіргі қарқыны көңіл қуантады. Күн сайын оның физикалық тұрғыдан ширай түскенін, күш-қуатының артқанын көріп отырмыз. Осы аптадағы жаттығу жиындарында ол өзін тамаша қырларынан көрсетті. Әсіресе, допқа иелік еткен сәтте оның бірден алға ұмтылып, шабуылды ширатуға тырысатын қасиеті біз үшін өте маңызды." — деді бапкер.

Сондай-ақ, клуб жетекшілігі Исламның алдағы матчтарда нәтижеге тікелей әсер ететініне сенімді.

"Маусымның ең маңызды, шешуші кезеңі жақындап қалды. Осындай сәтте Чесноковтың біз үшін орны бөлек болмақ. Оның шеберлігі команданың алға қойған мақсаттарына жетуіне септігін тигізеді деп үміттенеміз." — деп түйіндеді сөзін Дерек Макиннес.