ҚПЛ трибуналары неге күрт босап қалды? – Өте төмен көрсеткіш тіркелді

KazFootball.kz мәліметінше, сегіз матчты бар-жоғы 26 500 жанкүйер тамашалаған. Орташа есеппен бір ойынға 3 313 көрерменнен келген. Бұл көрсеткіш маусым басындағы жалпы қарқынмен салыстырғанда айтарлықтай төмен.  

5-турдың көрермен жағынан басты ойыны Астанада өтті. “Астана” мен “Ордабасы” арасындағы 1:1 есебімен аяқталған матчқа 13 600 адам жиналған. Яғни осы бір кездесу турдың жалпы аудиториясының жартысына жуығын жалғыз өзі берген. Бұл да 5-турдың жалпы көрінісін айқын аңғартады: бір орталық матч трибунаны толтырды, ал қалған ойындардың басым бөлігінде жанкүйер саны тым төмен болды.  

Ең аз көрермен жиналған матч Алматыда өтті. “Алтай” мен “Ұлытау” арасындағы кездесуді небәрі 300 адам тамашалаған. Бұған дейін маусымдағы ең әлсіз көрсеткіш 3-турға тиесілі болып келген еді: ол кезде сегіз матчқа 36 512 жанкүйер жиналып, орташа көрсеткіш 4 564 болған. Демек, 5-тур бұрынғы антирекордтан да төмен түсіп кетті.  

5-турдағы толық көрермен көрсеткіші мынадай:

“Астана” – “Ордабасы” матчына 13 600 адам, “Қызылжар” – “Жеңіс” ойынына 4 000, “Оқжетпес” – “Ертіс” кездесуіне 3 800, “Тобыл” – “Қайрат” ойынына 3 000 жанкүйер келген. Ал төменгі бөлікте “Жетісу” – “Елімай” матчында 800, “Атырау” – “Қайсар” және “Ақтөбе” – “Каспий” ойындарында 500-ден, “Алтай” – “Ұлытау” матчында 300 көрермен тіркелген.  

Соған қарамастан, маусымның жиынтық көрсеткіші әзірге жаман емес. KazFootball.kz дерегі бойынша, чемпионат басталғалы бері ҚПЛ матчтарына жалпы 225 353 көрермен келген. Орташа есеппен бір ойынға 5 634 жанкүйерден айналады. Яғни мәселе бүкіл маусымда емес, дәл осы 5-турда көрермен қызығушылығының күрт төмендеп кеткенінде болып тұр.