Қызылордада Чемпиондар лигасының матчтары өтпек
Қызылордадағы жаңа "Қайсар Арена" енді ресми түрде УЕФА-ның 4-санаттағы талаптарына сай келеді. Бұл дегеніміз мұнда Чемпиондар лигасының топтық кезең матчтары мен Ұлттық құраманың ресми іріктеу ойындарын өткізуге толық мүмкіндік бар. Бұған дейін мұндай деңгейдегі ареналар тек Астана мен Алматыда ғана болған еді.
Стадион 11 000 көрерменге арналған, бұл УЕФА-ның ең төменгі талабынан 3 000 орынға көп. Көрермендер үшін 700-ге жуық автотұрақ бар, ал көлік қатынасы барынша ыңғайлы. Аренаға кіру және шығу үшін қаладағы алты көше қосылған.
Мұнда әлемдегі үздік жарық жүйелерінің бірі – Philips ArenaVision орнатылған. Ол 2000 люкстен астам жарық беріп, 4K форматында тікелей трансляция жасауға мүмкіндік береді. Бұл ойыншыларға, төрешілерге және жанкүйерлерге тамаша көріну деңгейін қамтамасыз етеді.
Стадионға 2022 жылғы әлем чемпионатына жабдық жеткізген өндірушіден LED-экрандар орнатылған. Сонымен қатар бес VIP-кабина, SkyBox, мүгедектерге арналған арнайы аймақтар мен көтергіш лифтілер, комментаторларға бөлмелер, баспасөз орталығы және техникалық аймақтар қарастырылған.
Кіру жүйесі де әлемдік деңгейде. Австрияның Skidata электронды турникеттері орнатылған, олар Еуропаның ең ірі ареналарында қолданылады.
Стадиондағы жасанды алаң "Астана Аренадағы” жабындымен бірдей. FieldTurf компаниясының 6 см биіктіктегі синтетикалық шөбі, кварцты құм мен резеңке түйіршіктен тұратын көпқабатты құрылым, REHAU жылытқыш жүйесі және Германиялық Perrot суару жүйесі орнатылған.
Стадионның салынуына байланысты қалада үш бесжұлдызды қонақүй, соның ішінде "Rixos" бой көтеруде. Бұл Қызылорданы халықаралық матчтарға келген жанкүйерлер мен командалар үшін толыққанды қабылдау орталығына айналдырады.
Біздің серіктес: FONBET