Максим Самородов ойнайтын "Ахмат" клубы мамырдағы үздік футболшысын атады
Қазақстан құрамасының шабуылшысы Максим Самородов Грозныйдың «Ахмат» клубының мамыр айындағы үздік ойыншысы атағына жүргізілген жанкүйерлер дауыс беруінде екінші орынға ие болды.
Клубтың ресми Telegram-арнасы таратқан мәліметке сәйкес, дауыс беру қорытындысы бойынша, бірінші орынды 20 ұпаймен жартылай қорғаушы Лечи Садулаев иеленді. Ол төрт ойында матчтың үздік ойыншысы атанған.
Максим Самородов 6 ұпай жинап, екінші орынға тұрақтады. Ол үш матчта үшінші, бір матчта екінші орын алған. Үздік үштікті Вадим Ульянов түйіндеді – оның еншісінде 4 ұпай.
Осылайша, мамыр айының үздігі болып Лечи Садулаев танылды.
Айта кетейік, Самородов биылғы маусымда «Ахмат» сапында 32 матч өткізіп, 8 гол соғып, 4 нәтижелі пас берген. Сонымен қатар, оның бір голы Ресей Премьер-лигасының «Маусым голы» номинациясына үміткер атанған болатын.
Біздің серіктес: FONBET