Ағылшындық «Манчестер Юнайтед» «Баварияның» қорғаушысы Альфонсо Дэвисті өз қатарына қосуды басты міндеттердің бірі ретінде қарап отыр. Жазғы трансферлік ауысымда олар «Реал» Мадридтың алдын орап кетпекші. Бұл туралы Англияның белді спорттық телеарнасы Sky Sports мәлімдеді.
Канадалық латеральдің осы маусым соңында «Бавариямен» келісім-шарты аяқталады. Әзірге, Германияның алпауыты Дэвиспен келісімді созу бойынша бір мәмілеге келе алмауда. Ал канадалыққа еркін агент ретінде бақыр тиын төлемей өз командасына қосуға «Реал» Мадрид бұрыннан көз тігіп отыр. Флорентино Перес жатса-тұрса да сол қапталдан Альфонсо Дэвисті көргісі келетінін жасырмай айтып жүр. Енді бұл шытырман трансферге Манчестер Юнайтед килігіп, қорғаушыны корольдік клубтан жұлып әкетпекші. Ағылшындар қысқы трансфер ашылысымен Дэвиспен келіс-сөздер жүргізуге ниетті. Бұл ойыншыға «қызыл сойқандардың» жаңа бас бапкері Рубен Аморим де қызығушылық танытып отырған көрінеді. Демек, Еуропа футболында Мбаппенің жыры бітіп, енді Альфонсоның хикаясы басталмақ.
Біздің серіктес: FONBET