«Манчестер Юнайтед» 18 жасар екі ойыншыны қатарға қосты

"Манчестер Юнайтед" ресми сайтында "Пеньяроль" клубында ойнаған 18 жастағы уругвайлық ойыншы Факундо Пельистридің трансфері туралы хабарлады.

Англиялық клуб ойыншымен тағы бір жылға ұзарту мүмкіндігі қарастырылған 5 жылдық келісімшартқа отырды. Transfermarkt мәліметі бойынша мәміле 8,5 миллион еуроны құрады.

"Манчестер Юнайтед" сияқты тарихы үлкен клубқа қосылу орындалмайтын арман секілді көрінген. Мен "Пеньяроль" клубында көп нәрсе үйрендім және мен үшін жасаған жақсылықтары үшін алғыс айтқым келеді. Бапкердің сенімі - бұл таңғажайып сезім, мен Сульшермен жұмыс істеу дамуым үшін өте қолайлы екенін білемін. Мен керемет ойыншыларға толы командаға ауысып жатырмын. Олардан әр күн сайын бірдеңе үйренуге тырысамын. Барлығы "Манчестер Юнайтедтің" жас ойыншыларға мүмкіндік беретін клуб екенін біледі және мен сол мүмкіндіктерді пайдалану үшін және Англияда өзімді көрсету үшін күн сайын тер төгуге дайынмын", - деді Пельистри.

2020/2021 маусымында Пеллистри "Пеньяроль" үшін барлық турнирлерде 17 кездесу өткізіп, онда 1 гол соққан және 2 нәтижелі пас берген.

"Манчестер Юнайтед" ресми сайтында шабуылшы Амад Траоренің трансфері туралы "Аталантамен" келісім жасасқанын жариялады.

18 жастағы шабуылшы жаңа командасына алдағы қысқы трансферлік терезеде қосылады. Оған дейін Траоре жеке келісімшарттың талаптарын келісіп, медициналық тексерістен өтіп, ойнауға рұқсат алуы керек.

Траоре - италиялық "Аталантаның" түлегі. Негізгі команданың құрамындағы дебютін 2019 жылдың 27 қазанында А сериясында "Удинезеге" қарсы ойында (7:1) өткізді. Дебюттік кездесуінде Траоре гол соқты. Амад - "Сассуоло" футболшысы Хамед Траоренің бауыры.

"Манчестер Юнайтед" 3 ойында 3 ұпай жинап, Англия Премьер-лигасының турнирлік кестесінде 16-орында тұр