Атакенттік «Мақтаарал» клубы жеті ойыншымен келісім-шартқа отырғанын хабарлады.
29 жастағы франциялық жартылай қорғаушы Биллал Себайхи «Сент-Этьеннің» түлегі болып табылады. 2020 жылы ол ақтаулық «Каспийдің» намысын қорғап, 8 кездесуде 4 гол соғып, 3 нәтижелі пас берді. Одан бөлек, Алжир, Португалия, Түркия чемпионаттарында өнер көрсеткен. Соңғы кездері румыниялық «Херманнштадт» командасында доп тепті.
Молдова құрамасының 26 жастағы қорғаушысы Артем Розгонюк бұған дейін «Шериф», «Сперанца» және «Сфинтул Георге» клубтарында ойнаған. Молдова құрамасында 13 ойын өткізген. Қорғаушының соңғы клубы молдовалық «Петрокуб» ( 48 матч, 1 гол, 2 нәтижелі пас) болды.
Тәжікстан құрамасының 22 жастағы шабуылшысы Шериддин Бобоев бұған дейін өз еліндегі «Баркчи» мен «Истиклол», сондай-ақ малайзиялық «Пенанг» командаларында өнер көрсеткен. Ол клубтық мансабында бас-аяғы 52 матч өткізіп, 17 гол мен 4 нәтижелі пасты өз атына жазған. Сондай-ақ шабуылшы ұлттық құрама сапында 22 ойынға қатысып, 2 мәрте мергендік танытқан.
28 жастағы ресейлік қорғаушы Егор Потапов өткен маусымда «Қайсардың» негізгі құрамынан ойып тұрып орын алды (31 матч, 2 гол). Бұған дейін ол Беларусь, Литва, Эстония және Қырғызстан чемпионаттарында бақ сынаған.
34 жастағы беларусь қорғаушысы Руслан Юденков футболдағы бар ғұмырын өз елінде өткізді. Беларусь Премьер-лигасында 157 матч өткізіп, 5 гол мен 4 нәтижелі пастың авторы атанды, ал Бірінші лигада 113 ойынға қатысып, 22 гол соққан.
24 жастағы жартылай қорғаушы Ринат Джуматов «Атырау» командасының түлегі. Ол Премьер-лигадағы дебютін 2018 жылдың наурыз айында өткізіп, бүгінгі күнге дейін 36 матчта 1 гол және 2 нәтижелі пасты өз еншісіне жазды.
19 жастағы жартылай қорғаушы Ғалымжан Кенжебек «Қайраттың» түлегі. Ол 2020 жылғы чемпионатта негізгі командада дебют жасап, бүгінге дейін небәрі 3 ойын өткізген. Бірінші лиганың өткен маусымында «Қайрат-Жастар» сапында 18 матчқа қатысып, 9 гол соқты, 3 нәтижелі пас берді.
Біздің серіктес: FONBET