Марк Гуаль: «Ақша ештеңеге әсер ете алмайды»

Испаниялық футболшы Грек командасының деңгейін мойындай отырып, алаңдағы нәтижені клубтардың қаржылық мүмкіндіктері емес, футболшылардың ойыны анықтайтынын атап өтті.

Гуальдың айтуынша, жоғары деңгейдегі қорғаушыларға қарсы ойнау шабуылшылар үшін үлкен тәжірибе жинауға мүмкіндік береді. Ол осындай кездесулерде өз мүмкіндігін көрсетіп, футболдан ләззат алуға тырысатынын жеткізді.

«Алдағы матчта Де Вреймен қарсыласу ма? Мен үшін жоғары деңгейдегі қорғаушыларға қарсы ойнау әрдайым қызықты. Мұндай матчтардың әрқайсысы тәжірибе береді. Ең бастысы — ойыннан ләззат алу. Иә, Панатинаикос — үлкен клуб, бірақ алаңда ақшаның өзі ойнамайды. Барлығы футбол алаңында шешіледі», — деді «Қайрат» шабуылшысы. 

Испаниялық легионер Қазақстан чемпионатындағы жағдайға да тоқталды. Оның пікірінше, «Қайрат» әлі де чемпиондық атақ үшін күресу мүмкіндігін сақтап отыр. Сондықтан команда тек Еурокубокке назар аударып, ұлттық біріншілікті екінші орынға ысырып қоймайды.

«Біз Қазақстан Премьер лигасында чемпион болу мүмкіндігін әлі жоғалтқан жоқпыз. Сондықтан алдағы жағдайды көре жатармыз. Әр матчқа жеке-жеке дайындалып, біртіндеп алға жылжимыз», — деді Гуаль.

Шабуылшы өзінің нәтижелілігіне қатысты да пікір білдірді. Ол гол соғу мен шабуылда тиімді ойнау кәсіби футболшының негізгі міндеттерінің бірі екенін айтты. Гуаль қазіргі көрсеткіштеріне таңғалмайтынын, өйткені өзінің мүмкіндіктерін жақсы білетінін және жаттығуда көп еңбек ететінін жеткізді. 

«Қайрат» пен «Панатинаикос» арасындағы Конференция лигасының жалпы кезеңіндегі кездесу 22 қазанда Алматының Орталық стадионында өтеді. Матч Астана уақытымен 19:30-да басталады.

Грекиялық клуб алғашқы турда үш ұпай жинаса, «Қайраттың» еншісінде әзірге бір ұпай бар. Алматылықтар өз алаңында жеңіске жетіп, турнирлік жағдайын жақсартуға ниетті.