Неймардың кезекті ауысымы футбол әлемін дүр сілкіндіруі мүмкін

2025 жылдың басында ол Сауд Арабиясының "Әл-Хилал” клубындағы сәтсіз кезеңнен кейін өз отанына — "Сантосқа” оралған болатын. Алайда бұл оралу күткендей әсерлі болмады. "Сантос” қазір Бразилия чемпионатында небәрі 16-орында тұр, яғни құлдырау аймағынан бір саты ғана жоғары. Ал Неймар тағы да жарақаттармен күресіп жүр.

Футболшының келісімшарты маусым соңында, яғни желтоқсанда аяқталады. Бұл — оны 2026 жылдан бастап еркін агентке айналдырады. Сондықтан Неймар алдағы уақытта өз мансабына жаңа серпін беріп, Бразилия құрамасының бас бапкері Карло Анчелоттидің назарына қайта ілігуді қалайды.

Ол ұлттық құрама сапында соңғы рет екі жыл бұрын, Уругвайға қарсы іріктеу матчында ойнаған еді. Сол ойында ол тізесінен ауыр жарақат алып, ACL байланысын үзген болатын.

Испанияның Sport басылымының хабарлауынша, Неймар Еуропаға қайта оралуды қалағанымен, әзірге бірде-бір клуб нақты ұсыныс жасамаған. Қазір оның алдында екі нұсқа бар: "Сантоспен” келісімшартты жарты жылға ұзарту немесе АҚШ-тың MLS лигасына қоныс аудару.

Неймардың әкесі оның Бразилияда қалғанын қалайды, алайда "Сантос” қазір элиталық дивизионда қалу үшін жанталасуда. Сондықтан команданың болашағы бұлыңғыр.

Дегенмен, АҚШ-тағы "Интер Майами" клубы Неймардың келесі аялдамасына айналуы әбден мүмкін. Егер бұл трансфер жүзеге асса, Неймар бұрынғы "Барселонадағы" серіктері Лионель Месси және Луис Суареспен қайта қауышады. Үшеуі кезінде футбол тарихындағы ең қаһарлы шабуыл триосының бірі болған еді, бірге Чемпиондар лигасын және Испания чемпионатын жеңіп алған.

"Атлетико Мадридтен” жалға келген Родриго де Паульдің трансфері де түпкілікті сатып алу шартымен аяқталмақ, бірақ бұл Неймардың келуіне кедергі болмайды.

Sport дерегінше, Неймардың Италияға кетуі туралы қауесеттер — негізсіз. "Интер” мен "Наполи” клубтарына ауысу туралы ақпараттар расталмаған.

Айта кетсек, "Интер Майами" биыл MLS Шығыс конференциясында 3-орын алып, плей-оффқа жолдама алған.