Бүгін, 13 маусымда Нидерланды құрамасы Украина құрамасымен кездесті. Матч Амстердамдағы (Нидерланды) "Йохан Кройф Арена" стадионында өтіп, 3:2 есебімен алаң иелерінің пайдасына аяқталды. Кездесуде Феликс Брих бастаған германиялық төрешілер тобы қызмет етті.
Нидерланды құрамасы 52-минутта Жоржиньо Вейналдумның арқасында алға шықты. 7 минуттан соң номиналды алаң иелері есепті еселеді - бұл жолы Ваутер Вегорст көзге түсті. Матчтағы интрига 75-минутта Андрей Ярмоленконың соққан әдемі голынан кейін қайта оралды. 79-минутта Украина есепті теңестірді: Руслан Малиновскийдің айып добынан асырған пасын Роман Яремчук ұтымды пайдаланды. Бірақ матчтағы соңғы сөз Нидерландыда қалды. 85-минутта Дензел Думфрис өз командасына жеңіс сыйлады. Дәл осы Думфрис матчтың үздік ойыншысы ретінде танылды.
Естеріңізге сала кетейік, С тобында Украина мен Нидерландыдан басқа Австрия мен Солтүстік Македония құрамалары бақ сынауда, олардың арасындағы кездесу 3:1 есебімен австриялықтардың пайдасына аяқталды. Осылайша, Нидерланды мен Австрияда үш ұпайдан бар, Македония мен Украинада соңғы орынды өзара бөлісіп тұр.
Біздің серіктес: FONBET