"Қайрат" ФК бас директоры Марат Баймұханов пен "Қайрат Мәскеудің" директоры Антон Чистяков жаңа клуб туралы сұхбат берді.
- Әріптестер, қайырлы күн! "Қайрат Мәскеу" туралы соңғы жаңалықтармен бөліссеңіздер...
- Қайырлы күн! - деп Антон әңгімені бастады.
Ия, жағымды жаңалықтар бар. 18 мамырда клуб Ресейде өткізілетін кәсіби жарыстарға қатысуға ресми түрде жолдама алды және жазда турнирдің үшінші сатысында өнер көрсетуін бастайды.
- Команда қайда орналасады?
- Команда Мәскеу облысында, Красногорск қаласына орналасады. Ойындар мен жаттығулар "Зорький" стадионында өтеді.
- Мәскеуге баратын құрам дайын ба?
- Иә, әрине, - деп әңгімесін жалғастырды Марат Бүркітұлы.
Команданың бас бапкері біздің маман Кирилл Сергеевич Кекер болады. Кирилл Сергеевич - біздің академияның ең табысты жаттықтырушыларының бірі. Оның басшылығымен әр жылдары біздің жастарымыз Қазақстан Чемпионатында, түрлі турнирлерде, соның ішінде халықаралық турнирлерде де медаль жеңіп алды. Өткен маусымда ол негізгі командада Алексей Шпилевскийдің көмекшісі болды және Чемпионатта алтын медаль жеңіп алды.
Ойыншыларға келетін болсақ, команда "Қайрат" ФК Академиясының тәрбиеленушілері және "Қайрат-Жастар" командасының 19-20 жас аралығындағы ойыншыларынан жасақталатын болады.
- Мәскеудегі "Қайраттың" алғашқы ойындары қашан өтеді?
- Чемпионаттың басталуы шілде-тамыз айларына жоспарланған. Осы уақытқа дейін команда Алматыда болады және жаңа маусымға "Қайраттың" базасында дайындалады. Сонымен бірге U18 командасының кейбір ойыншылары (2004 және 2003 ж.т.) "Қайрат-Жастар" командасының құрамында Қазақстан Республикасының Бірінші Лигасында өздерін көрсетуге мүмкіндік алады.
Біздің серіктес: FONBET