ҚФФ "Ордабасы" клубын жазалауға негіз таппады

1. ТБК мәжілісінде қаралған күннің басты тақырыбы "Ордабасы" жанкүйерлерінің мәселесі болды. Айта кетейік, Біріншіліктің ІІ-турының аясында өтуі тиіс болып, бірақ ойналмай қалған "Ордабасы" - "Астана" матчынан кейін қонақтар жанкүйерлерінің қауіпсіздігін жөнді қамтамасыз етпегені үшін "Астана" футбол клубы ҚФФ-қа осы мәселеге жауаптыларды жазаға тарту туралы арызданған болатын. Соған байланысты барлық материалдарды жан-жақты қарастырып, басты арызданушы "Астананың" баспасөз хатшысы Нестеренконың түсініктемесін тыңдаған Тәртіптік-бақылау комитетінің мүшелері барлық жайтты талқыдан өткізіп, арызданушы жақтың талабын орындамау туралы шешім қабылдады. Себеп - аталған мәселеге байланысты нақты дәлелдердің болмауы. 2. Сондай-ақ, мәжіліс барысында ТБК мүшелері басқа да мәселелерді қарастырып, өз шешімдерін шығарды. Мәселен, Қазақстан чемпионатының  ІІІ-туры аясында өткен Премьер-лига мен дубльдік құрамдар арасындағы матчтарда алаңнан қуылған ойыншылардың тәртібтері де талқыланды. Сөйтіп, қызыл қағаз алған мына футболшылар алдағы бес матчқа қатысу құқықтарынан айырылды. • Стахив Александр - "Қайсар" - "Тараз" кездесуі кезінде қарсыласын ұрғаны үшін алаңнан қуылған болатын. • Сергиенко Эдуард - "Қайсар" - "Тараз" кездесуі кезінде қарсыласын ұрғаны үшін алаңнан қуылған болатын. • Ларин Сергей - Дубльдік құрамдар арасындағы "Атырау" - "Қайрат" кездесуі кезінде қарсыласын ұрғаны үшін алаңнан қуылған болатын. 3. Бұлардан бөлек, "ЦСКА" футбол клубының ойыншысы Оңжан Бекжанның бес матчтық дисквалификациясын үшеуге дейін қысқарту туралы шешім қабылданды. алаш арена