"Реалдың" кезекті жеңісі

Бүгін түнде УЕФА Суперкубогы үшін қазіргі Чемпиондар лигасы мен Еуропа лигасының жеңімпаздары, тиісінше испаниялық "Реал" мен англиялық "Манчестер Юнайтед" күш сынасты. Нәтижесінде Зидан баптайтын ұжым Погба бастап, Лукаку қостаған жігіттерді 2:1 есебімен тізе бүктіріп, Манчестерге құр қол қайтарды. Кездесу басталысымен ширақ қимылдаған испандар ойынның 24-ші минутында есеп ашты. Карвахальдың айып алаңына асырған добына бірінші болып жеткен Каземиро Де Хеадан айласын асырды. Ойынның екінші бөлігінде мадридтік ұжым есепті 2:0-ге жеткізді. Бэйлмен пас алмасқан Иско матчтың 52-ші минутында қақпа торын тулатты. Араға 10 минут салып, кездесудің 62-ші минутында ағылшындар Лукакудың көмегімен есеп айырмасын қысқартты. Алайда қос ұжым алма-кезек шабуылдағанымен таблодағы есеп өзгермеді. Ойынның бітуіне  байланысты бас төрешінің ысқырығы шалынып, кездесу  аяқталды. Бұл "Реалдың" осы маусымдағы алғашқы кубогы. Корольдік клубтың ойын өрнегі, ойыншыларының маусымға дайындығы көңіл көншітерлік, осы қарқынын жоғалтпаса маусым аяғында мүмкін болатын трофейлерді алуға мүмкіндіктері зор. Мұндай жетістікке осыған дейін 2008-2009 жылғы маусымда Гвардиоланың "Барселонасы" жеткен. Ал Зиданның "Реалы" мұндай дәрежеге жете ала ма? Оны уақыт көрсете жатар, ал әзірге 1/6. "Реал"(Мадрид, Испания) 2:1 "Манчестер Юнайтед" (Манчестер, Англия)          Голдар: 24-ші мин,Каземиро(Карвахаль), 52-ші мин,Иско(Бэйл) - 62-ші мин,Лукаку

Руслан Мералиев