Ресей дауыс беруден қалай жеңіске жетуді біледі

Біздің уақытпен бейсенбі күні түнде Цюрихте футболдан 2018 жылғы және 2022 жылғы әлем чемпионаттарын өз жерінде өткізетін елдер анықталды. 2018 жылғы әлем чемпионатын өткізу құ­қығына Ресей қол жеткізсе, 2022 жылғы әлем чемпионатының қожайыны Катар бо­лып бекітілді. 2010 жылғы әлем чем­пио­наты көпшіліктің табаны тимеген «Қа­ра­құрлықта» өтіп еді, енді 2018 жылғы мун­диаль тамаша стадиондары өте аз, үл­кен қалаларының арасы тым алшақ Ре­сей­де өтіп, 2022 жылғы дүбірлі дода са­ха­ра­ның аптап ыстығына бергісіз Катар топы­ра­ғында өтпек. Кімге тиімді, кімге тиімсіз? Өз­деріңіз бағалай жатарсыздар. Бір қызығы, дәл қазір осындай ірі дү­бір­лі додаларды өткізетін жерлерді таңдап алу барысында не бұрынғыдай ұлттық құ­ра­­маларының деңгейіне, не қазіргідей ин­фра­құрылымдық жүйесіне мейлінше көңіл бө­лу қалып бара жатқандай. Әлде Зепп Блат­тер айтқандай, негізінен, әлем чем­пио­натының өткізілу жағрафиясын кеңейте бе­ру мақсат па? Ресейдің қарсыласы Англия, Бельгия/Гол­ландияның, сондай-ақ Испания/Пор­ту­г­а­лия болатын. Яғни соңғы төртеуі өз кан­­дидатураларын бірігіп ұсынған. Осы­лар­дың арасынан Ресей озды. 2007 жыл­ғы шілде айында Гватемаледе өткен Ха­лық­­аралық Олимпиада комитетінің (ХОК) 119-сессиясында 2014 жылғы қысқы Олим­пиада ойындарын Сочиде өт­кізу құ­қығын жеңіп алған Ресейге Цюрихте 2018 жылғы әлем чемпионатының қожа­йы­ны атағына қол жеткізу қиын болып па, тәйірі?! Дәл сол жолы Владимир Путиннің өзі Гва­те­ма­леге барып, ХОК мүшелері алдында ағыл­шынша және французша сөз сөйлеп, қа­рекет қылса, бұл жолы ол Цюрихке да­уыс беру аяқталған соң ғана барып, жур­на­­листерге сұхбат берді. Ресейден басқа да­­уысқа түскен елдердің барлығының пре­мьер-министрлері Цюрихке барып, бір­неше сағат отырса да, жеңіліп қайтты. Ал Ре­сей басшысы өздерінің әлем чемпио­натын өткізуге лайықты екендерін дәлел­деу­ге берілетін мүмкіндікте «тер төкпей-ақ» жеңіске жетті. Дәл қазір орыстардың – қағанағы қарқ, сағанағы сарқ. Ал ағыл­шын­дар «ғаламшарда екі-ақ құпия ұйым қал­ды – ФИФА және КФСБ» деп егілуде. 15 миллион фунттарының далаға кеткені­не де налиды. Ал 2022 жылғы әлем чемпионатын өз ел­дерінде өткізу құқығын Катар жеңіп ал­ды. Олардың қарсыластары АҚШ, Жа­по­ния, Корея және Австралия болған. Жалпы, Ка­тар – спортқа көп қаржы бөліп, көп кө­ңіл бөлетін елдердің бірі. Бұл елде «Формула-1» бәйгесінің кезеңдік жа­рыс­та­ры, теннистен жыл соңындағы чем­пион­дар додасы және басқа да деңгейі өте жо­ға­ры спорттық шаралар ұйымдастырылып жүр. Дохада жазғы Азия ойындары да өте­тін­дігін айта кетуге болады. Сонымен, дәл қазір Ресей мен Катардың ай­дарынан жел есіп тұр. Ресейде 2014 жылы қысқы Олимпиада ойындары өтеді, 2018 жылы футболдан әлем чемпионаты жа­лауын желбіретеді, 2013 жылы жазғы уни­версиада алауын тұтатады, 2013 жылы әлемнің үздік жеңіл атлеттері де осы елде бас қосады. Сонымен қатар Ресей «Фор­му­ла-1» бәйгесінің кезеңдік жарыстарын өт­кізу үшін бесжылдық келісімшартқа қол жеткізді, тағысын тағы… Қысқасы, Ресейде спорттық дода көп, той көп. Ал бізде әзірше VIІ қысқы Азия ойындары ғана.

“Алаш айнасы”