Салах Палестиналық футболшының өліміне байланысты УЕФА-ға үн қатты
"Ливерпульдің" шабуылшысы Мохаммед Салах Палестина құрамасының бұрынғы ойыншысы Сулейман әл-Обейдтің қазасына қатысты жарияланған УЕФА-ның жазбасына жауап берді.
УЕФА-ның Х-тегі ресми парақшасында 41 жастағы бұрынғы футболшының өмірден өткенін хабарлаған жазба жарияланған еді.
"Қош бол, Сулейман әл-Обейд “Палестиналық Пеле”. Ең қиын сәттердің өзінде мыңдаған балаға үміт сыйлаған талант” — делінген жазбада.
Мысырлық футболшы осы жазбаны өз парақшасына қайта жариялап, УЕФА-дан оның өліміне қатысты толық ақпарат беруді сұрады.
"Ол қалай, қай жерде және не үшін қаза тапқанын айта аласыздар ма?” — деп жазды Салах.
Айта кетейік, 2025 жылдың 6 тамызында Палестина футбол қауымдастығы Сулейман әл-Обейдтің Газа секторының оңтүстігінде гуманитарлық көмек күтіп тұрған сәтте Израильдің әуе шабуылы салдарынан қаза тапқанын хабарлаған болатын.
Сулейман әл-Обейд кәсіби мансабында "Аль-Шати", "Маркез Шабаб аль-Амари" және "Газа Спорт” клубтарында ойнап, 100-ден аса гол соққан.
Біздің серіктес: FONBET