"Тобыл" тоқтаған шығар?

“Елімай” – “Тобыл” матчында Покатилов бекерден-бекер қателесіп допты “Елімай” ойыншысына бере салды. Осының кесірінен Қостанай клубы үш ұпайдан айырылды десек артық емес. Осылайша, бұл команда чемпиондық атаққа таластан шығып қалды. Ұпайы да, ойыны да жетпейтінге ұқсайды. Қалған матчтың барлығын жеңіп, сенсация жасамаса, былайша мүмкіндік қалмады. Масқара, ұят-ай! Санжар Сейтқазинов пен Әлімжан Қалдияр секілді азаматтарға бұл бір сын болды. Енді амал жоқ, келесі маусымға дайындық бастай берсе болады. 

“Ақтөбе” жаңа бапкермен сенімді түрде жеңіске жетті. Ойнататын, шабуылдайтын бапкерге ұқсайды. Құрамындағы мықты ойыншылар “Жетісумен” арадағы деңгей айырмашылығын жасап берді. Есеп 3:0. “Ақтөбе” енді қайтадан чемпиондыққа таласа алады. Алдағы ойындарды сүрінбей, маңызды 3 ұпайларды теріп жүре тұру қажет. Командада жаңа бапкер, жаңа тыныс! Жалпы “Ақтөбе” өте мықты үміткер десек артық емес. 

“Ордабасы” түсініксіздеу, біртүрлілеу, джунглилау матчта “Атыраудан” басым түсті. Асха Тағыберген алыстан теуіп, қақпашы Хаткевичті шок қылды. Ұстап тұрған добынан айырылып қалған беларус қақпашы гол өткізіп алды. Осы гол 3 ұпай еншілеуге жеткілікті болды. “Орданың” әлі 2 ойыны бар екенін ескерсек, көлеңкеде демалып тұрған фаворит десек артық  емес. Бұл кісілер кейінге шегерілген 2 матчта 6 ұпай еншілесе қызықтың көкесі сол болмақ. 

Жалпы алғанда чемпиондыққа талсатын 4 команда болып тұр. Елдің бәрі “Елімайды” адам санамап еді, міне, Семей командасы фавориттер қатарында тұр. Бұлай қашанға дейін барарын кім білсін? Келесі ойындар қалай өтеді - ол да маңызды. Енді күзгі сессияда әрбір ойын дау-дамай, қиян-кескі шабуылдармен өріледі. Ешкім оңай жеңілмейтін жағдайға келіп жеттік. ҚПЛ биыл қандай қызық иә?