Түркістандағы сорақылық – “Тұран” футболшылары үш ай бойы тегін жұмыс істеген бе?
Түркістандық “Тұран” клубының айналасында қаржылық дау өршіп тұр, деп хабарлайды Aladop.kz.
Клубтың дамуы туралы пафосқа толы есептердің тасасында шын мәнінде сұмдық жағдай жасырылған болып шықты. ЖаркOFF телеграм арнасының хабарлауынша, команда ойыншылары мен қызметкерлері бірнеше ай бойы жалақысыз еңбек етіп келеді.
Приватизация ма, әлде мазақ па?
Биылғы жылдың 20 наурызында клуб жекеменшік қолға өтті. Алайда, жаңа қожайын да, бұрынғы иесі облыстық әкімдік те жиналып қалған үш айлық қарызды өтеуге асығар емес. Футболшылар мен бапкерлер құрамы маусым алдындағы дайындық пен оқу-жаттығу жиындарын мүлдем тегін өткізген.
“Ойыншыларға ҚПЛ-ға қайта оралу міндеті қойылғанымен, олардың еңбегі еленбей отыр. Үш ай бойы “рахметке” жұмыс істеу кәсіби клуб үшін масқара жағдай.”
Тіпті киетін формалары да жоқ!
Қаржылық дау мұнымен бітпейді. Мәліметтерге қарағанда, команданың материалдық базасы мүлдем ақсап тұр:
– Ерлер командасында тек қонақта ойнайтын форма жиынтығы ғана бар.
– “Томирис-Тұран” әйелдер командасында тіпті киетін киім де жоқ.
– Ойыншылардың маусымға арналған толыққанды экипировкасы әлі күнге дейін берілмеген.
Футболшылардың жасырын наразылығы
Бірінші лиганың алғашқы турында “Академия Оңтүстіктен” өз алаңында жеңілуі кездейсоқтық емес деген болжам бар. Бұл жеңіліс арқылы футболшылар басшылыққа өз наразылықтарын білдіріп, мұндай жағдаймен келіспейтіндіктерін аңғартқан көрінеді.
Мақтан тұтар Түркістанның бас командасы осындай күйге түскенде, клубтың болашағы не болмақ? Жаңа инвестор мен әкімдік арасындағы түсініспеушілік қарапайым еңбек адамдары мен спортшылардың тағдырына балта шабуда.
Біздің серіктес: FONBET