Ұлттық құрама қосынына жарақатпен келген
04.09.2024, 12:52
Ел құрамасы бапкері Станислав Черчесов Рамазан Оразовтың құрама қосынына жарақатпен келгенін хабарлады, деп жазады Meta-ratings.kz.
“Силькеборгтың” ойындарына тұрақты түрде қатысып жүрген Рамазан Оразов өз командасының Дания чемпионатының 7-турындағы “Мидтьюланнға” қарсы кездесуіне қатыспады. Футболшы аталған матчтың алдында жарақат алып қалды деген болжам бар.
“Рамазан Оразов аяғын МРТ қондырғысына түсірді. Нәтижесін күтейік”, - деп айтты Станислав Черчесов.
Қазірде ел құрамасы Алматыда жаңа бапкердің нұсқауымен 6 қыркүйекте өтетін Норвегиямен болатын ойынға қызу дайындалуда.
Айта кетейік, 26 жастағы жартылай қорғаушы 2021 жылдан бері құрама жейдесінде 27 матч өткізіп, 1 гол соқты.