15-тур. "Қайрат" "Ордабасыдан" опық жеді

Қазақстан премьер-лигасының 15-тур ойындары өз мәресіне жетті. 6 ойынның тек біреуінде ғана алаң иелері жеңіске жетсе, 4 ойында қонақтар басым болып, 1 ойын тең нәтижемен аяқталды. Чемпионаттың мықтыларынан тек "Ақтөбе" ғана ұпай жоғалтты. Қарағандыға қонақтап барған Мұқанов шәкірттері Финонченко соққан жалғыз допқа жауап қайтара алмады.

Өз алаңында "Ақтөбені" 3:0 есебімен жеңіп жүрген "Қайрат" шымкенттен келген шеберлердің алдында шарасыз қалды. Қайта алғашқы минуттарда белгіленген пенальтиді Қайрат Әшірбеков соға аламай қалды. Әйтпегенде, шымкенттіктер шаруаны ертеден бітіріп тастар ма еді.

Оңтүстік жігіттері 1-таймда толықтай басымдылыққа ие болған. Касянов пен Евстигнеевтердің ортадан бағыттаған соққылары "Қайрат" қақпашысы Цветковқа оңай тимеді. Қапталдағы Нұрғалиев жылдам жүгіре финттер көрсетіп қорғаушылардың есін шығарды. Өткір шабуылдағы Перич техникалық арсеналын толлықтай паш етіп, қайта-қайта айып алаңына суырылып кіріп жатты. Бірақ, "Ордабасылықтар" сапында үздік өнер көрсеткен деп екінші таймда шыққан Дәуренбек Тәжімбетовты айтуға болар.

Арал өңірінің тумасы қорғаушылардың қателігін ұтымды пайдаланып, алыстан жойқын соққылар бағыттап, маңызды голдарды соқты. Бойшаңдығының арқасында 2-қабаттағы доптардың барлығына үн қатып, өзінің командағы пайдалылығын көрсетті.

Никитенко өз еркіменен бас бапкерлік қызметінен кеткеннен кейін, осы ойынға команданы Эдуард Глазунов алып шықты. Көбінесе жастарға сенім артып, жылдам шабуылдарға иек артты. Балтиевтің алаңда болмағаны да өзінің әсерін берді. Головской орталық алаңдағы үлкен жүкті толыққанды көтере алмады. Ағылшындық Джон Генри деген бапкер келуі ықтимал деген сөз шығып жатыр соңғы кезде. Бұрын Англия құрамасында доп тепкен ағылшындық бапкер 6 рет ұлттық құраманың жейдесін киген екен.

Осы турдағы елең еткізер кездесу Керекуде өтті. Толқыны қатты "Ертіс" "Жетісуды" 2:0 есебімен ұтып жатқан болатын. Бірақ Асқар Қожабергенов оңай беріле қойсын ба, жігеттеріне жігер беріп, қалай қимылдау керектігін дәл айтыпты. Бірінің артынан бірін 3 гол соққан талдықорғандықтар керемет жеңіске жетті.

15-турдан кейінгі турнир кестесі