Қарағанды «Қарағанды» болғалы, кеншілер қаласының ел ішіндегі, әлемдегі спорт саласынан көрінген жетістіктері күн санап артып келеді. Облыс аймағында спорттың барлық түрлеріне аса көңіл бөлінеді. Сол сан түрлі спорт ойындарының ішінде, әлемдегі ең тартымды, ең әсерлі, ең көркем, ең қызықты спорт – футболдың алатын орны ерекше. Қазақстанның орталық өңірінде аяқдопқа қызығушы адамдардың саны күннен-күнге арта түсуде. Болашақта Еуропа, Латын Америкасы елдеріндегі секілді аяқдоп, барлық елдің жүрегін жаулап алады деген үміттеміз. «Еңбектеген баладан, еңкейген қарияға дейін», футбол ойнайтынына сенімдімін. Қарағандыда 3 футбол клубы жұмыс атқарады. Олардың көшбасшысы, барлық ТМД елдеріне КСРО заманынан таныс, Алматылық «Қайраттың» Кеңес футболындағы сыңары – «Шахтер» болып табылады. «Кеншілер клубының» сапында көптеген шетелдік легионерлермен қоса қазақстандық ойыншылар тер төгеді. Команда жыл сайын жалынды жас жеткіншектермен толықтырылып отырады. Жастарды тәрбиелеуде Қарағандының өз ішіндегі аудандар арасында «Қазақтың бас ақыны» - Абай Құнанбайұлының атымен аталатын ауданның алатын орны ерекше десек, қаталеспейміз.
Ел тәуелсіздігін алғаннан бері, Абай ауданындағы футбол жыл санап көркейе түсуде. Ол әрине төккен тер мен табанды еңбектің арқасында. Еліміз жаңа құрылып келе жатқан ұрымтал сәтте, көк тиын жалақы алмаса да, қиын-қыстау кезеңде жас бүлдіршіндерді жасыл алаңға алып шығып, жаттықтыру жұмыстарын жүргізген бапкерлердің еңбегі ерен. Ауданның бапкерлеріне қойылатын басты талап, жыл сайын 15-16 жасар жеткіншектерді Қарағандының басты клубы «Шахтерға» тапсыру. Ауданды бүгінгі таңда 1994-1995 пен 2004-2005 аралығындағы әр-түрлі жас категориясындағы балалар футболға қатысады. Ауданның түлектері арасында 3 ойыншы «Шахтердің» негізгі құрамында өнер көрсетеді: Мангуткин Ильнур(1986ж.), Тарасов Стас(1988ж.) және Пикалкин Игорь(1992ж.). Аталған ойыншылардың арасында Тарасов жуырда теміртаулық клуб «Болат АМТ-ға» ауысты. Ал соңғысы, ең жасы, яғни, Игорь Пикалкин Қазақстан Республикасы жастар құрамасының қорғаушысы. Игорьдің болашағынан барлық Абай ауданы, Қарағанды облысы зор үміт күтеді. Сонымен қатар, «Шахтердің» қосалқы құрамында да екі абайлық жас жеткіншек өнер көрсетеді: Елецкий Артем(1992ж.), Нуйкин Александр(1992ж.). Биылғы жылы да оннан астам абайлық жас жеткіншектер, «Кеншілер клубына» барып, өз бақтарын сынап көрмек. Осы жетістіктердің барлығы да, өлкедегі жастардың спортқа деген мөлдір махаббаты мен Тарасов.А., Ағыбаев.Т., Сахончик.А., Әділбеков.Б. сынды, ауданымыздағы бапкерлердің жұмыла еңбек етуінің алғашқы нәтижелері деп қарастырсақ болады. Демек, Қарағандының, Абай ауданының аяқдоп шеберлерінің көрінетін биіктері әлі алда. Қазақ футболының мерейін үстемдететін жалынды жастар мен білікті бапкерлер көп болғай!
Абылай КАРИН
Қарағанды облысы, Абай қаласы.
Біздің серіктес: FONBET
