Нигерия бапкері Eric Chelle
Әлем чемпионатына іріктеудің CAF аймағындағы финалдық плей-офф матчынан кейін Нигерия құрамасының бас бапкері Эрик Челле Конго Демократиялық Республикасының ойыншыларын пенальти сериясы кезінде "дуа немесе тылсым тәсілдер қолданды" деп айыптап, үлкен дауға себеп болды, деп хабарлайды Aladop.kz.
Негізгі уақыт 1:1 есебімен аяқталған соң, матч пенальти сериясына өткен. Тартысты додада Конго ДР құрамасы 4:3 есебімен жеңіске жетіп, ӘЧ-2026 іріктеуінен Нигерияны шығарып тастады.
Пенальти аяқталысымен Челле қарсы команданың бірнеше қызметкеріне барып, қатты наразылық білдірді. Оны өз штабы әрең ажыратып алған.
Нигерия бұл ойынға сенімді көңіл-күймен келген еді. Олар плей-офф жартылай финалында Габонды 4:1 есебімен ойсырата жеңіп, өздеріне мүмкіндік сыйлаған болатын.
Финалда да жақсы бастады — матчтың үшінші минутында-ақ Фрэнк Оньека есеп ашқан.
Алайда Конго ДР футболшысы Мешак Элия жарты сағаттан кейін есепті теңестірді. Қос команда да бірнеше мүмкіндік жасағанмен, негізгі уақытта әрі қарай гол соға алмады.
Шешуші кезеңде Конго ДР қақпашысы Тимоти Файюлу нағыз батыр атанды. Ол Нигерия қорғаушысы Семи Ажайдие тепкен пенальтиді қайтарып, өз командасына басымдық сыйлады.
Ал шешуші соққыны капитан Шансель Мбемба дәл орындап, өзінің елін әлем чемпионатының іріктеу кезеңіне әрі қарай алып шықты.
Африканың ең күшті құрамаларының бірі Нигерия құрамасы осылайша қатарынан екінші рет Әлем чемпионатына бара алмайтын болды. Құрамында Виктор Осимхен, Адемола Лукман секілді жұлдыздары бар команда үшін бұл үлкен соққы болып отыр.
