“Ақтөбеге” ФИФА-дан қатаң жаза қаупі төнді – Миллиондық қарыз бен лас трансфердің құпиясы ашылды

ЖаркOFF телеграм арнасының хабарлауынша, “Ақтөбе” жартылай қорғаушы Пабло Альварестің трансфері үшін Львовтың “Карпаты” клубына тиісті қаражатты әлі төлемеген. Қарыз сомасы: 150 000 еуро. Төлем жасау уақыты осы жылдың 1 наурызында аяқталған.

Қазіргі таңда Украина клубы өсімпұл есептеп, ФИФА-ға ресми шағым түсіріп қойған. Халықаралық федерация бұл мәселеде “Карпаты” жағын қолдайтыны анық, ал бұл “Қызыл-Ақтар” үшін трансферлік бан (жаңа ойыншыларды тіркеуге тыйым салу) деген сөз.

Бұл трансфердің айналасында тек қарыз емес, үлкен күмән де бар. Мәліметтерге сәйкес, Испаниялық футболшының ауысуы өте түсініксіз жағдайда өткен:

1. Агенттер шеруі: Трансферге Альвареске еш қатысы жоқ бірнеше Украиналық агенттер араласқан.

2. Бұрынғы басшылықтың ізі: Бұл шикі келісімдердің басында клубтың сол кездегі басқарма төрағасы Арман Оспанов тұрған деседі.

3. Оспановсыз қалған “Ақтөбе”: Оспанов қазір клубта жоқ, бірақ оның қысқа мерзімді, бірақ шулы қызметінің зардабын клуб әлі күнге дейін тартып отырғандай.

Егер клуб жақын арада қарыз бен өсімпұлды жаппаса, маусым ортасында құрамды күшейту мүмкіндігінен айырылады.