Футболдан Қазақстан ұлттық құрамасының бас бапкері Александр Бородюкпен 2018 жылы әлем чемпионатының іріктеу аясындағы Қазақстан-Дания матчы алдында әңгімелескен едік.
– Александр мырза, әлем чемпионатына іріктеу аясындағы ертеңгі Данияға қарсы ойынға дайындықтарыңыз қандай? – Шәкірттерім 10 маусымдағы ойынға 100 пайыз дайын болу үшін тынбай жаттығу жасауда. Талғарда орналасқан базамыз футболшыларға өте қолайлы. Жуырда футболшылар дайындалатын орталықты заман талабына сай жөндеп, пайдалануға берді. Бұйырса, өз жерімізде, жанкүйерлеріміздің алдында жақсы ойын көрсетеміз деп ойлаймын. Ұлттық құрама футболшыларымен қатар, Талғарда жастар құрамасы да дайындалуда. Бір сөзбен айтқанда, кездесуге тас-түйін дайынбыз.
– Былтыр Копенгагенде өткен Қазақстан-Дания арасындағы алғашқы кездесуді көрген боларсыз. Сіздіңше, сол ойында Қазақстан құрамасына не жетіспеді?
– Нақты мына нәрсе жетіспеді деп тап басып айта алмаймын. Кез келген жеңілістен соң оң қорытынды жасау керек. Біз көбірек жұмыс істеп, алға қарай жылжуымыз қажет. Сонда ғана жақсы нәтижеге жетуге болады.
– Дания құрамасының қазіргі мүмкіндігін қалай бағалайсыз? Қай футболшылары бізге қиындық туғызуы мүмкін?
– Дания құрамасы − еуропалық деңгейдегі үздік құраманың бірі. Футболшыларының көбі Еуропаның ТОП-5 чемпионатында ойнайды. Бұл – Дания құрамасының халықаралық деңгейде тәжірибесі бар деген сөз. Мысалы, ағылшын премьер-лигасындағы «Тоттенхэмнің» жартылай қорғаушысы Кристиан Эриксенді, Бундеслигадағы Менхенгладбахтың, «Боруссия» клубында доп тебетін қорғаушылар Андреас Кристенсен мен Янник Вестергорды, «Аякс» командасының жас шабуылшысы, жуырда ғана Еуропа лигасының финалында ойнаған Каспер Дольберг және тағы басқа тәжірибелі ойыншыларды атап өтуге болады.
– 10 маусым күні Қазақстан Ұлттық құрамасы қандай жағдайда сәтті ойын көрсетуі мүмкін? – Біз өз үйімізде яғни, Алматыда жанкүйерлеріміздің алдында ойнаймыз. Бұл футболшылар үшін өте маңызды. Стадион толы жанкүйер алдында шәкірттерім аянып қалмайды деп үміттенемін. Әр футболшы өзінің жақсы ойын өрнегін көрсетіп, тек жеңіс үшін алаңға шығады.
– Данияға қарсы матчқа дайындық барысында жастар құрамасымен кездесу өткізіпсіздер...
– Жетінші маусым күні еліміздің жастар құрамасымен бақылау ойын өткізіп, 4:2 есебімен жеңіске жеттік. Ойын жабық түрде болды. Сондықтан журналистерді шақырмадық. Бұл кездесу біраз қателіктерімізді көрсетіп берді. Данияға қарсы ойында қателіктерді түзейтін боламыз. Бұл ойын әрбір жас футболшының келешекте ұлттық құрама сапында ойнауға ұмтылу мақсатында жоспарланған. Айта кетерлігі, бізде жастар құрамасының жаттықтырушылар штабымен өзара түсіністік жақсы қалыптасқан.
– Жас футболшылардың ойынын қалай бағалайсыз?
– Әрине, олар біздің болашақтағы үмітіміз. Жастардың қазірден ұлттық құраманың негізгі футболшыларымен бірге жаттығуы оларды ынталандырып, қосымша күш береді. Тек еңбек етіп, тынбай жаттығып, өз-өзін дамытатын болса, болашақта жастардан көп үміт күтемін.
Әңгімелескен Әли БИТӨРЕ,
«Егемен Қазақстан» https://egemen.kz/article/aleksandr-borodyuk-alanhgha-zhenhis-ushin-shyghamyz
Біздің серіктес: FONBET
