Астанада футбол таланттарын анықтау бойынша алғашқы оқу курсы басталды

Бұл бастама – әлемдік футбол ұйымы іске асырып жатқан FIFA Talent Development Scheme бағдарламасының бір бөлігі. Жаһандық жоба элиталық жасөспірімдер футболын дамыту жүйесін жаңғыртуға бағытталған.

Курсқа кімдер қатысып жатыр?

Оқыту бағдарламасы республика бойынша талант іздеумен айналысатын мамандарды бір алаңға жинады. Атап айтқанда:

• өңірлік скауттар,
• жасөспірімдер құрамаларының бапкерлері,
• ҚФФ Академиясының мамандары,
• аймақтық орталықтардың өкілдері.

Қатысушылар арасында Қазақстандық футболда есімі белгілі тұлғалар бар.

Руслан Балтиев, Игорь Шпанера, Дмитрий Васильев, Иван Азовский, Владимир Никитенко, Станислав Погорелов, Виталий Астафьев, Нұржан Әбілдаев, Бауыржан Сағындық, Болат Есмағамбетов және Сергей Пак.

Бағдарламаның басты сарапшысы – FIFA маманы

Оқу курсының негізгі эксперті – FIFA Talent ID маманы Стив Марроу. Ол "Арсенал” академиясында ұзақ жыл жұмыс істеген, Еуропа футболындағы 25 жылдан астам тәжірибесі бар беделді сарапшы.

Мақсат – Қазақстанда бірыңғай Talent ID жүйесін қалыптастыру

Курстың негізгі мақсаты – Қазақстанда таланттарды бағалау мен іріктеудің біртұтас ұлттық моделін құру. Жаңа жүйе:

• қабілетті жас футболшыларды құрылымды түрде анықтауға,
• жасөспірімдер құрамаларын күшейтуге,
• өңірлік скауттардың тұрақты желісін қалыптастыруға мүмкіндік береді.

FIFA әдістемесі мен жаңа цифрлық экожүйе

Курс барысында қатысушылар:

• FIFA ойыншыларды бағалау методологиясын,
• U10–U21 жас аралығындағы футболшы дамуының критерийлерін,
• FI-TE-TA-ME индикаторларын (физика, техника, тактика, менталитет),
• жас футболшының әлеуетін талдау принциптерін
  меңгереді.

Сонымен қатар ҚФФ-тың жаңа скаутинг жүйесі таныстырылды. Ол:

• кеңейтілген аймақтық өкілдер желісін,
• EasyCoach цифрлық платформасын енгізуді,
• болашағы бар ойыншылардың ұлттық деректер базасын – Player ID Bank құруды қамтиды.

Практикалық бөлім – "Talent ID Cup" турнирінде

Оқыту бағдарламасының тәжірибелік бөлігі U-12 жас санатындағы "Talent ID Cup” турнирінде өтеді. Қатысушылар:

• жас футболшыларды тірі ойын барысында бақылап,
• позициялар бойынша салыстыру жүргізіп,
• топтық талдау жасап,
• әр ойыншыға жеке профиль дайындайды.

Бұл деректер кейін ұлттық Talent ID платформасына енгізіледі.