Футболдан Конференция лигасының 3-кезеңінде «Астананың» қарсыласы саналатын «Лозанна» клубы Швейцария біріншілігінің 2-турында «Тунға» жол берді.
Кездесу Тун қаласында өтті және алаң иелерінің 2:1 есебімен жеңісімен аяқталды. Жеңіске жеткен командадан голдарды Кристофер Ибайи (10-минут) және Женис Монтолио (47-минут) соқты. Қонақтар сапынан Мамаду-Кали Сене (71-минут) нәтижелі соққымен көзге түсті.
Еске сала кетейік, «Лозанна» - 2025/26 маусымындағы Конференциялар лигасының үшінші іріктеу кезеңінде «Астана» командасының қарсыласы. Алғашқы матч 7 тамызда Лозаннада өтеді. Жауапты ойын 14 тамызда Қазақстан астанасындағы «Астана Арена» стадионында болады.
