Берік Айтбаев: «Тараз» өзінің толық күшін әлі көрсеткен жоқ

20.05.2020 16:38 ҚПЛ

«Тараз» футбол клубының қорғаушысы Берік Айтбаевпен болған сұқбатты назарларыңызға ұсынамыз.

Берік Айтбаев: «Тараз» өзінің толық күшін әлі көрсеткен жоқ

- Берік, карантин кезіндегі уақытыңызды қалай өткіздіңіз? Үй жағдайында жасалған жаттығу мен командалық жаттығудың айырмашылығы қандай екен?

- Карантин уақытында күн тәртібін толықтай өзгертуге тура келді. Оған қоса, бапкерлер жеке бағдарлама жіберіп отырды. Өзім қатаң түрде режим сақтап, бабымды сақтауға тырыстым. Командалық жаттығудан ерекшелігі — жауапкершілікті толықтай өзіңе аласың. Әрине, бұлай жаттығу жасау үйреншікті емес, бірақ, бұл жағдайға әлемнің көп командалары ұшырады.

- Осы маусымда "Тараздан" не күтеміз? Маусым соңында турнирлік кестеде кемінде нешінші орынға тұрақтаймыз деген жоспар бар?

- Бапкерлік штаб айтқандай, басты мақсатымыз — алғашқы алтылық. Менің ойымша, бұны орындау қолымыздан келеді, дегенмен, көптеген факторлар да бар. Қалай болғанда да, тапсырманы орындауға тырысамыз.

- Араға біраз үзіліс салынғаннан кейін бабыңды жоғалтып аламын деген қорқыныш жоқ па?

- Қайталап айтамын, бұл жағдайға әлемнің командасы болды, сол себепті, үзіліс кезінде арқаны кеңге салуға болмайтынын ойыншылар түсінеді. Кімнің бабы қандай болатыны, жалпы нәтиже осыған байланысты.

- Биыл команда сапында көптеген өзгерістер болды. Ұжымға бірнеше жаңа ойыншылар келіп толықты. Осы ойыншылардың ішінен кімдерді ерекше атап өте аласыз?

- Командаға қосылған жаңа ойыншыларды бапкерлер дұрыс таңдағаны алғашқы екі турдың нәтижесі арқылы көрінді. Жаңадан келгендердің барлығы білікті. Ақпарат құралдарында айтылғандай, Тони Сильва екінші турдың үздік ойыншысының бірі атанды. Дегенмен, алған үш ұпай — бүкіл команданың арқасы. Біздің футболшылар әлі де толық қырынан ашылады деп сенемін.

- Тараз жанкүйерлеріне көзқарасыңыз қандай? Сіздерге көрсететін қолдауларына көңілдеріңіз тола ма?

- Жамбыл футболы дәстүрге бай, сондықтан, жанкүйерлеріміз үздік нәтиже күтеді. Біз олар үшін ойнауымыз қажет. Себебі, фанаттарымыз үлкен жеңісті сағынып та қалды. Үмітті ақтау үшін барымызды саламыз. Жанкүйерлерге салауатты өмір салтын ұстануын және қуанышты сәттерінің көп болуын тілеймін. Қолдауларыңызға рақмет!

1 пікір

  1. Ермұхамед Мәулен

    Берік Кезінде Ұлттық құрамаға шақырту алған. Оған қайтадан бір серпілу қажет. Өз ойынын табады деген ойдамын.