ФИФА мен футболшылардың халықаралық кәсіподақтары ойыншылардың денсаулығы мен қалпына келуіне қатысты маңызды шешімге келді.
ФИФА президенті Джанни Инфантино мен кәсіподақ өкілдерінің кездесуі клубтар арасындағы әлем чемпионатының финалының алдында Нью-Йоркте өтті. Келісім бойынша, енді ойыншылар үшін:
– Матчтар арасында міндетті түрде кемінде 72 сағаттық үзіліс болуы тиіс
– Әр маусымның соңында кемінде 21 күндік демалыс берілуі қажет
ФИФА бұл үзіліс пен демалыс күндерінің әр клуб пен ойыншының жеке кестесіне, сонымен қатар ұжымдық келісімшарттарға байланысты реттелетінін мәлімдеді.
Алайда, бұл қағидалар нақты қалай іске асатыны әзірге белгісіз. Мысалы, Еуропа лигасында бейсенбі күні кешке ойнайтын клубтар ұлттық біріншіліктегі келесі кездесуін әдетте жексенбіде өткізеді. Жаңа талап бойынша, енді бұл ойын дүйсенбіге шегерілуі мүмкін. Бірақ кейбір лигаларда, мысалы, Бундеслигада дүйсенбі күндері матчтар өткізілмейді, сондықтан бұл өзгерістерге бейімделу қажет болады.
