Jacob Neestrup
Грекияның SPORT24 басылымы «Панатинаикос» клубының бас бапкері Якоб Нееструптің Алматылық «Қайратқа» қарсы бұрынғы кездесуіне назар аударды, деп хабарлайды Aladop.kz.
Даниялық маман былтыр «Копенгагенді» жаттықтырып жүрген кезінде Қазақстандық командамен Чемпиондар лигасының жалпы кезеңінде кездескен еді.
2025 жылғы 26 қарашада өткен ойында «Копенгаген» Рафаэль Уразбахтин бастаған «Қайратты» 3:2 есебімен жеңді. Даниялық команда кездесудің негізгі бөлігінде 3:0 есебімен алда болғанымен, матчтың соңғы минуттарында Алматылықтар есеп айырмасын қысқартып, қарсыласына едәуір қысым көрсетті.
Ойынның 81-минутында Дастан Сәтпаев «Қайраттың» алғашқы голын соқты. Ал 90-минутта Олжас Байбек есепті 3:2-ге жеткізді. Бұған қоса, Еркін Тапаловтың соққысы қақпа қаңқасына тиді. Осылайша, Қазақстандық клуб кездесудің соңында есепті теңестіруге жақын болғанымен, камбэк жасауға уақыт жетпеді.
Грек басылымы Якоб Нееструптің «Қайратпен» бұрыннан таныс екенін атап өтті. Оның командасы өткен кездесуде жеңіске жеткенімен, ойынның соңғы бөлігіндегі екі өткізіп алған гол алматылықтардың оңайлықпен берілмейтінін көрсетті.
Енді «Қайрат» пен «Панатинаикос» УЕФА Конференциялар лигасының жалпы кезеңінде кездеседі. Матч 22 қазанда Алматыда өтеді. Бұл жолы Нееструп Қазақстандық клубқа қарсы басқа командамен келсе де, «Қайраттың» мүмкіндіктері мен ойын мәнерін жақсы білетіні анық.
