Шотландияның "Хартс" клубы Қазақстан құрамасының жартылай қорғаушысы Ислам Чесноковтың командаға ауысатынын тағы бір мәрте ресми түрде растады, деп хабарлайды Aladop.kz.
Клуб өкілдері трансфердің жаңа егжей-тегжейін ашып, ойыншының елге қашан келетінін де мәлімдегенін Heartsstandard.co.uk сайты жариялады.
Клубтың спорттық директоры Грэм Джонс:
"Біз Исламның желтоқсанның басында келуін асыға күтіп отырмыз. 14 қараша, жұма күні онымен сөйлестік — көңіл күйі өте жақсы, өзі бұл ауысуға қуанышты. Қазақстандағы ақпараттық дүрлігу бізге әсер етпейді. Біздің қолымызда алдын ала келісімшарт бар, ойыншы да келісімге разы. Ең басты мақсат — Исламның жаңа елге тез үйренуіне жағдай жасау. Қаңтардың басында толық дайын болып үлгеруі керек.” — деді.
